Pune Crime: पुणे जिल्ह्यातील उरुळी कांचन परिसरातून माणुसकीला लज्जास्पद वाटणारी एक अत्यंत भीषण घटना उघडकीस आली आहे. चारित्र्याचा संशय आणि मुलगा होत नसल्याच्या रागातून एका २४ वर्षीय विवाहितेवर तिच्या पतीने अमानुष अत्याचार केले. पीडितेच्या गुप्तांगावर ॲसिड ओतून तिला दोन आठवडे उपचाराविना घरात कोंडून ठेवल्याचा धक्कादायक प्रकार समोर आला आहे.
संशय आणि मुलगा नसल्याचा राग
मिळालेल्या माहितीनुसार, आरोपी पतीला पत्नीच्या चारित्र्यावर संशय होता, तसेच मुलगा होत नसल्याने तो वारंवार तिला त्रास देत असे. २० एप्रिल रोजी मद्यधुंद अवस्थेत त्याने पत्नीशी वाद घातला. “तुझे कोणाशी प्रेमसंबंध आहेत?” असा जाब विचारत त्याने तिला बेदम मारहाण केली. क्रूरतेचा कळस गाठत या नराधमाने पत्नीच्या शरीरावर ॲसिड ओतले. वेदनेने व्याकुळ झालेल्या पत्नीला त्याने घराबाहेर पडण्यास मज्जाव केला आणि दरवाजा आतून बंद करून घेतला.
१५ दिवस नरकयातना आणि अखेर सुटका
पत्नी गंभीर जखमी असतानाही “उपचारासाठी पैसे नाहीत” असे म्हणत आरोपीने तिला रुग्णालयात नेले नाही. कोणालाही माहिती दिल्यास जीवे मारण्याची धमकी देत तिला १५ दिवस घरातच डांबून ठेवले. अखेर ९ मे रोजी पती घराबाहेर गेल्याची संधी साधून पीडितेने आपल्या दोन लहान मुलींसह तिथून सुटका करून घेतली आणि आपले माहेर गाठले. माहेरच्या लोकांनी तिची अवस्था पाहून तत्काळ पोलिसांत धाव घेतली.
पोलिसांची कारवाई आणि उपचार
उरुळी कांचन पोलिसांनी या घटनेची गंभीर दखल घेत पीडितेला तातडीने पुण्यातील ससून रुग्णालयात उपचारासाठी दाखल केले आहे. पीडितेच्या तक्रारीनंतर आरोपी पतीविरोधात गुन्हा दाखल करण्यात आला असून त्याला अटक करण्याची प्रक्रिया सुरू आहे. पोलीस निरीक्षक सचिन वांगडे या प्रकरणाचा अधिक तपास करत आहेत.
