NEET Paper Leak : देशभरात गाजत असलेल्या NEET पेपरफुटी प्रकरणात तपास यंत्रणांना मोठे यश मिळाले असून पुण्यातून आणखी एका महत्त्वाच्या आरोपीला अटक करण्यात आली आहे. भौतिकशास्त्राच्या प्रश्नपत्रिकेशी संबंधित माहिती लीक केल्याच्या आरोपावरून मनीषा संजय हवालदार यांना CBI ने ताब्यात घेतले आहे.
तपास यंत्रणांच्या माहितीनुसार, मनीषा हवालदार या पुण्यातील एका शैक्षणिक संस्थेत कार्यरत होत्या. परीक्षा प्रक्रियेशी संबंधित जबाबदाऱ्या सांभाळताना त्यांना भौतिकशास्त्राच्या प्रश्नपत्रिकांपर्यंत प्रवेश मिळत होता. याच दरम्यान काही संवेदनशील माहिती बाहेर गेल्याचा संशय व्यक्त करण्यात आला आहे.
CBI कडून सध्या जप्त करण्यात आलेले मोबाईल फोन, लॅपटॉप, कागदपत्रे आणि इतर इलेक्ट्रॉनिक उपकरणांची सखोल तपासणी सुरू आहे. याआधी अटक करण्यात आलेल्या आरोपींशी मनीषा हवालदार यांचे संबंध होते का, तसेच प्रश्नपत्रिका लीक करण्यामागील संपूर्ण नेटवर्क कसे कार्यरत होते, याचा तपास सुरू आहे.
NEET UG परीक्षा पेपरफुटी प्रकरण समोर आल्यानंतर देशभरात मोठी खळबळ उडाली होती. त्यानंतर NTA आणि परीक्षा प्रक्रियेवर गंभीर प्रश्न उपस्थित झाले होते. या प्रकरणाचा तपास सध्या CBI कडून विविध राज्यांमध्ये सुरू आहे.
मिळालेल्या माहितीनुसार, पुणे, लातूर, नाशिक, अहिल्यानगर, दिल्ली आणि जयपूरसह विविध ठिकाणांहून आतापर्यंत एकूण ११ आरोपींना अटक करण्यात आली आहे. या संपूर्ण रॅकेटमागील मुख्य सूत्रधार, आर्थिक व्यवहार आणि इतर संबंधित व्यक्तींचा शोध घेण्यासाठी तपास अधिक तीव्र करण्यात आला आहे.
