Maharashtra Politics : अहिल्यानगरच्या राजकारणात मोठी घडामोड घडण्याची शक्यता असून प्राजक्त तनपुरे यांच्या भाजप प्रवेशाची चर्चा जोर धरू लागली आहे. राष्ट्रवादी काँग्रेस शरदचंद्र पवार पक्षाचे माजी मंत्री असलेले तनपुरे हे ३० मे रोजी भाजपमध्ये प्रवेश करणार असल्याची माहिती सूत्रांकडून समोर येत आहे. त्याचबरोबर भाजपकडून त्यांना विधानपरिषदेची उमेदवारी मिळण्याचीही जोरदार चर्चा रंगली आहे.
अहिल्यानगर स्थानिक स्वराज्य संस्था मतदारसंघातून भाजप तनपुरेंना उमेदवारी देण्याच्या तयारीत असल्याचे बोलले जात असतानाच भाजपचे देवळाली प्रवराचे नगराध्यक्ष सत्यजित कदम यांनीही उमेदवारीची इच्छा व्यक्त केली आहे. सत्यजित कदम हे भाजपचे माजी आमदार चंद्रशेखर कदम यांचे पुत्र आहेत.
“२००९ पासून पक्ष आदेश पाळत आलो, आता निष्ठावंत कार्यकर्त्याला संधी मिळावी,” अशी प्रतिक्रिया सत्यजित कदम यांनी दिल्याने स्थानिक भाजपमध्येही चर्चांना उधाण आले आहे. भाजपने तनपुरेंना उमेदवारी दिल्यास स्थानिक कार्यकर्ते कोणाच्या बाजूने उभे राहणार, याकडे राजकीय वर्तुळाचे लक्ष लागले आहे.
दरम्यान, प्राजक्त तनपुरे हे गेल्या काही दिवसांपासून देवेंद्र फडणीवस यांच्या संपर्कात असल्याची चर्चा आहे. राहुरी पोटनिवडणुकीवेळी त्यांनी माघार घेतल्यानंतर त्यांच्या राजकीय भूमिकेबाबत अनेक तर्कवितर्क रंगले होते.
विशेष म्हणजे तनपुरे यांनी अलीकडेच फेसबुकवरील प्रोफाईल फोटोमध्ये जयंत पाटील यांचा फोटो लावल्याने राजकीय चर्चांना आणखी वेग आला आहे. हा भावनिक संदेश देण्याचा प्रयत्न असल्याचीही चर्चा रंगत आहे.
प्राजक्त तनपुरे यांनी काही दिवसांपूर्वी केलेले वक्तव्यही सध्या चर्चेत आहे. तत्त्वांशी एकनिष्ठ राहणाऱ्यांचे राजकारण संपत चालले आहे, अशी खंत त्यांनी व्यक्त केली होती. तसेच २०२४ विधानसभा निवडणुकीत घड्याळ चिन्हावर निवडणूक लढवण्याचा प्रस्ताव नाकारल्याचेही त्यांनी सांगितले होते.
तनपुरेंच्या संभाव्य भाजप प्रवेशामुळे अहिल्यानगर जिल्ह्यात भाजपची ताकद वाढण्याची शक्यता व्यक्त केली जात असून, शरद पवार यांच्या राष्ट्रवादी काँग्रेससाठी हा मोठा धक्का मानला जात आहे.
