नवी दिल्ली: जम्मू आणि काश्मीरमधील पहलगाम येथे झालेल्या दहशतवादी हल्ल्याचा भारताने बदला घेतला आहे. पाकिस्तानसोबत सुरू असलेल्या तणावाच्या पार्श्वभूमीवर, भारताने पाकव्याप्त काश्मीरमधील नऊ दहशतवादी तळांवर क्षेपणास्त्रे डागली. पहलगाम दहशतवादी हल्ल्याच्या १५ दिवसांनंतर, भारताने दहशतवाद्यांचा खात्मा केला आहे. मिळालेल्या माहितीनुसार, भारताने पाकिस्तान आणि पाकव्याप्त काश्मीरमधील दहशतवादी तळांवर हवाई हल्ले केले आहेत. भारतीय सशस्त्र दलांनी या ऑपरेशनला ‘ऑपरेशन सिंदूर’ असे नाव दिले आहे.
दरम्यान, वृत्तसंस्था एएनआयने सूत्रांच्या हवाल्याने वृत्त दिले आहे की, ऑपरेशन सिंदूर अंतर्गत, भारतीय लष्कर, नौदल आणि हवाई दलाने संयुक्त कारवाई करत पाकिस्तान आणि पाकव्याप्त काश्मीरमधील अनेक ठिकाणी हल्ले केले. दहशतवाद्यांचा खात्मा करण्यासाठी सैन्याने अचूक हल्ला करणाऱ्या शस्त्रांचा वापर केला. भारतीय भूमीवरूनच लष्कराने दहशतवाद्यांना धडा शिकवला आहे.
नऊ लक्ष्यांपैकी चार पाकिस्तानमध्ये आणि पाच पाकव्याप्त काश्मीरमध्ये .
सूत्रांनुसार, भारतीय सैन्याने यशस्वीरित्या लक्ष्य केलेल्या नऊ लक्ष्यांपैकी चार पाकिस्तानमध्ये आणि पाच पाकव्याप्त काश्मीरमध्ये आहेत. पाकिस्तानमधील बेसमध्ये बहावलपूर, मुरीदके आणि सियालकोट यांचा समावेश आहे. दहशतवादी छावण्यांना लक्ष्य करण्यासाठी विशेष अचूक शस्त्रे वापरली गेली. तिन्ही दलांनी संयुक्तपणे ही कारवाई केली. भारतातील दहशतवादी कारवायांना प्रोत्साहन देण्यात भूमिका बजावणाऱ्या जैश-ए-मोहम्मद आणि लष्करच्या वरिष्ठ नेतृत्वाला लक्ष्य करण्याच्या उद्देशाने भारतीय लष्कराने हल्ल्यांसाठी हे ठिकाण निवडले होते.
संरक्षण मंत्रालयाने म्हटले आहे की, भारतीय सैन्याने ज्या दहशतवादी तळांपासून भारताविरुद्ध दहशतवादी हल्ले आखले आणि निर्देशित केले गेले त्या दहशतवादी तळांना लक्ष्य केले आहे. एकूण नऊ ठिकाणांना लक्ष्य करण्यात आले. आमच्या कृती केंद्रित, पूर्वनियोजित आणि आक्रमक नसलेल्या आहेत. कोणत्याही पाकिस्तानी लष्करी तळाला लक्ष्य करण्यात आले नाही.
मंत्रालयाने म्हटले आहे की, भारताने लक्ष्यांची निवड आणि हल्ल्याच्या पद्धतीमध्ये खूप संयम दाखवला आहे. पहलगाम येथे झालेल्या क्रूर दहशतवादी हल्ल्याच्या पार्श्वभूमीवर ही पावले उचलण्यात आली आहेत, ज्यामध्ये २५ भारतीय आणि एका नेपाळी नागरिकाचा मृत्यू झाला होता. या हल्ल्यासाठी जबाबदार असलेल्यांना जबाबदार धरले जाईल या आमच्या वचनबद्धतेचे आम्ही पालन करत आहोत. ‘ऑपरेशन सिंदूर’ बद्दल सविस्तर माहिती लवकरच दिली जाईल, असे मंत्रालयाने म्हटले आहे.
