Latur Heatstroke : राज्यावर सध्या सूर्याच्या प्रखर झळा बसत असून, वाढत्या तापमानाने निष्पाप जीवांचा बळी घेण्यास सुरुवात केली आहे. लातूर जिल्ह्यात उष्माघाताचा कहर पाहायला मिळत असून, औसा तालुक्यातील गोंद्री गावात एका नऊ महिन्यांच्या बाळाचा उन्हाच्या तडाख्याने मृत्यू झाल्याचा प्राथमिक संशय व्यक्त केला जात आहे. या हृदयद्रावक घटनेमुळे संपूर्ण जिल्ह्यावर शोककळा पसरली आहे.
लातूरमध्ये मृत्यूचे सत्र सुरू
लातूर जिल्ह्याचा पारा सध्या ४१ अंश सेल्सिअसच्या पुढे गेला आहे. गेल्या काही दिवसांतील उष्माघाताचा हा दुसरा बळी ठरला आहे. चार दिवसांपूर्वी औराद शहाजनी येथील एका ६० वर्षीय शेतकऱ्याचा शेतात काम करताना उन्हाने मृत्यू झाला होता. गोंद्री येथील बाळाच्या मृत्यूने लहान मुले आणि ज्येष्ठांच्या सुरक्षेचा प्रश्न ऐरणीवर आला आहे.
अहिल्यानगरमध्ये शिक्षिकेवर काळाची झडप
उष्णतेचा हा प्रकोप केवळ लातूरपुरता मर्यादित नसून, अहिल्यानगर जिल्ह्यातही एका जिल्हा परिषद शिक्षिकेचा दुर्दैवी अंत झाला आहे. पारनेर तालुक्यातील उषा फापाळे (५०) या शाळेतून दुपारी १२ वाजता दुचाकीवरून घरी परतत असताना त्यांना उन्हाचा तीव्र तडाखा बसला. घरी पोहोचताच त्यांना चक्कर आणि अस्वस्थता जाणवू लागली. उपचारासाठी हलवत असतानाच त्यांची प्राणज्योत मालवली. याच तालुक्यातील ढवळपुरी येथेही एका महिलेचा शेतात काम करताना मृत्यू झाल्याची घटना ताजी आहे.
आरोग्य विभागाची ‘हाय अलर्ट’ सूचना
उष्माघाताचा वाढता धोका लक्षात घेता प्रशासनाने कडक नियमावली जाहीर केली आहे:
- वेळेचे भान: दुपारी १२ ते ४ या वेळेत अत्यावश्यक कामाशिवाय घराबाहेर पडणे टाळा.
- पाण्याचे नियोजन: शरीरातील पाण्याचे प्रमाण कमी होऊ देऊ नका, सतत पाणी आणि द्रव पदार्थांचे सेवन करा.
- पोशाख: प्रवासात डोके झाकून ठेवा आणि सुती, सैल कपड्यांचा वापर करा.
- विशेष काळजी: लहान मुले आणि वृद्धांच्या प्रकृतीवर सतत लक्ष ठेवा.
