Sangli Politics : भाजप आमदार गोपीचंद पडळकर यांच्या टीकेला काँग्रेसचे आमदार विश्वजीत कदम यांनी मिश्किल शैलीत प्रत्युत्तर देत सांगलीच्या राजकारणात नवा रंग भरला आहे. कदम यांनी हात जोडून आणि हसतच पडळकरांना “महान नेते” म्हणत थेट डोनाल्ड ट्रम्प यांच्या स्तराशी तुलना केली.
सांगली लोकसभा निवडणुकीच्या पार्श्वभूमीवर पडळकर यांनी राष्ट्रवादीचे जयंत पाटील आणि विश्वजीत कदम यांच्यावर गंभीर आरोप करत तिकीट वाटपात गैरप्रकार झाल्याचा दावा केला होता. या आरोपांवर प्रतिक्रिया देताना कदम यांनी उपरोधिक शैलीचा वापर करत विषय हलक्याफुलक्या पद्धतीने हाताळला.
“पडळकर हे खूप मोठे नेते आहेत. ते ट्रम्प यांच्या लेव्हलचे आहेत. आम्ही सामान्य लोक त्यांच्या स्तरावर जाऊन बोलू शकत नाही,” असा टोला कदम यांनी लगावला. त्यांच्या या वक्तव्यामुळे राजकीय वर्तुळात चर्चा रंगली आहे.
दरम्यान, पडळकर यांनी “माझ्या भीतीमुळेच विरोधक एकत्र आले आहेत” तसेच “यांना जास्त ज्ञान नाही” अशी टीका केली होती. त्यासोबतच सांगली लोकसभा उमेदवारीवरूनही त्यांनी मोठा दावा करत विशाल पाटील यांना काँग्रेसकडून तिकीट मिळणार नाही, हे आधीच ठरले होते, असा आरोप केला.
या पार्श्वभूमीवर कदम-पडळकर वाद अधिक चिघळण्याची शक्यता असून, पुढील प्रतिक्रिया काय येते याकडे सर्वांचे लक्ष लागले आहे.
