छत्रपती संभाजीनगर : दोन हॉस्पिटलमध्ये जमा झालेली रक्कम एका बॅग घेऊन डॉक्टरचे वडील घराकडे जात असताना तोंडाला रूमाल बांधून आलेल्या दोन आरोपींनी काही समजण्याच्या आतच बॅग हिसकावून पळ काढला. या बॅगेत तब्बल दहा लाख रुपयांची रोख रक्कम होती. ही घटना १२ डिसेंबर रोजी सायंकाळी चाटे शाळेजवळ सातारा परिसरात घडली.
या प्रकरणी सखाराम दगडुजी शिंदे (७२, रा. प्लॉटनंबर ४, गट क्रमांक ९६, चाटे शाळेजवळ, सातारा परिसर) हे सेवा निवृत्त आहेत. त्यांच्या मुलाचे हॉस्पिटल रेणुका माताकमानी जवळ आहे. याशिवाय जालना येथे एक हॉस्पिटल आहे. १२ डिसेंबर रोजी सायंकाळी सात वाजेच्या दरम्यान सखाराम शिंदे हे त्यांच्या मुलांच्या हॉस्पिटलला गेले. तेथे जालना येथील हॉस्पिटलचे मागील एका महिन्याचे सहा लाख रूपये आणि सातारा भागातील हॉस्पिटलचे साडे चार लाख रूपये जमा होते.
सदर एकुण १० लाख ५० हजार रूपयांची रक्कम एका बॅगेत ठेवून, सखाराम शिंदे हे स्कुटीवरून त्यांच्या घराकडे निघाले. सखाराम शिंदे हे चाटे शाळेजवळ त्यांच्या घराकडे आले असता, या ठिकाणी घरासमोरील लोखंडी गेट उघडून ते घरात प्रवेश करत असता, २५ ते ३० वयोगटातील दोन युवक हे तोंडाला रूमाल बांधुन त्यांच्यावजळ आले. त्यांनी सखाराम शिंदे यांच्या हातातून साडे दहा लाख रुपयांची बॅग हिसकावून पळून गेले.
