Mumbai Police : मुंबईत वाहनांवर बेकायदेशीरपणे लाल, निळे आणि पिवळे फ्लॅश लाईट्स तसेच सायरन लावून फिरणाऱ्यांवर वाहतूक पोलिसांनी मोठी कारवाई केली आहे. गेल्या दोन दिवसांत मंत्रालय आणि विधानभवन परिसरात विशेष मोहीम राबवत तब्बल ८० वाहनांवर कारवाई करण्यात आली असून त्यांवरील बेकायदा दिवे आणि सायरन जप्त करण्यात आले आहेत.
वाहतूक पोलिसांनी दिलेल्या माहितीनुसार, अशा प्रकारचे दिवे आणि सायरन केवळ आपत्कालीन सेवा आणि अधिकृत शासकीय वाहनांनाच वापरण्याची परवानगी आहे. मात्र अनेक खासगी वाहनचालक प्रतिष्ठा दाखवण्यासाठी किंवा वाहतुकीत सवलत मिळवण्यासाठी त्यांचा गैरवापर करत असल्याच्या तक्रारी वाढल्या होत्या.
या पार्श्वभूमीवर पोलिसांनी कडक कारवाई करत संबंधित वाहनचालकांवर मोटार वाहन कायद्यानुसार दंडही आकारला आहे. पोलिसांनी स्पष्ट केले की, अशा दिव्यांचा गैरवापर केल्यामुळे इतर वाहनचालकांमध्ये संभ्रम निर्माण होतो आणि सुरक्षेच्या दृष्टीनेही धोका वाढतो.
पुढील काळातही अशी मोहीम सुरूच राहणार असून नियम मोडणाऱ्यांवर अधिक कठोर कारवाई करण्यात येणार आहे. गंभीर प्रकरणांमध्ये वाहनाची नोंदणी रद्द करण्याची शिफारस करण्यात येईल, तसेच गुन्हाही दाखल केला जाऊ शकतो, असा इशारा पोलिसांनी दिला आहे.
दरम्यान, नागरिकांनीही सतर्क राहून बेकायदा दिवे किंवा सायरन वापरणाऱ्या वाहनांची माहिती पोलिसांना देण्याचे आवाहन करण्यात आले आहे.
