माहूर : विदर्भ सीमेवरील तालुक्यातील कुपटी, साकुर, हिंगणी, कुदींगडी या परिसरात विदर्भातील चोरटे वाळू चोरी करत असल्याची माहिती मिळाल्यावरून महसूलच्या पथकाने शनिवारी (दि. २१) मध्यरात्री हिंगणी फाट्याजवळ अवैध वाळू उपसा करून वाहतूक करणाऱ्या ट्रॅक्टरचा पाठलाग करत ट्रॅक्टर पकडून सदर वाहन तहसील कार्यालयात जमा केले आहे.
माहूर तालुक्यात वळसा घालून वाहणाऱ्या पैनगंगा नदी पात्रातील ९ असे घाट आहेत ज्या ठिकाणाहून वाळूची तस्करी केली जाते. मात्र, मागील पंधरवड्यात अनेक घाटांचे रस्ते खोदून वाळू तस्करीला महसूले विभागाने आळा घातला आहे. या शिवाय अवैध वाळू वाहतुकीविरुद्ध सतत कारवाया सुरू आहेत. तथापि अशा कारवायांना न जुमानता मराठवाडा विदर्भ सिमेलगतच्या गावात विदर्भाच्या बाजूने वाळू तस्कर सक्रीय झाले आहेत. या बाबतची माहिती नायब तहसीलदार कैलास जेठे यांना मिळाली.
त्यांनी केरोळी फाटा, हिंगणी फाटा, ईवळेश्वर ते कुपटी या रस्त्यावर हिंगणी फाटा येथे पाळत ठेवली. सकाळी चारच्या दरम्यान एक ट्रॉली असलेल्या विनाक्रमांकाचा ट्रॅक्टर वाळू भरून वन विभागाच्या हद्दीत जंगलातील झाडीत लपवून ठेवलेला दिसला. तेथे उभा असलेल्या चालक गणेश नथू पतंगे याची चौकशी केली असता ट्रॅक्टरमधून वाळू चोरी करून नेत असल्याचे कबूल त्याने दिली. त्यावरून ट्रॅक्टरचा तिथेच नागरिकांना बोलावून पंचनामा करण्यात आला. त्यात त्याने ट्रॅक्टर (एमएच २६ सी इ ७५९६) असल्याचे सांगितले त्यामूळे ट्रॅक्टर तहसील कार्यालय माहूर येथे आणून जप्त करण्यात आला.
