गोवंडी : कारच्या धडकेत आईला दुखापत झाल्याने दोन मुलांनी निघृणपणे चाकूने सपासप वार करून ३८ वर्षीय कार चालकाची हत्या केल्याची खळबळजनक घटना गोवंडीतील करमण मामा नगरमध्ये घडली. याप्रकरणी हत्येचा गुन्हा दाखल करून शिवाजी नगर पोलिसांनी अब्दुल करीम शेख ऊर्फ दादू आणि मोहम्मद शरीफ अब्बास अली शेख ऊर्फ पप्पू यांना बेड्या ठोकल्या आहेत.
‘पोलिसांनी दिलेल्या माहितीनुसार, शनिवारी रात्री अकराच्या सुमारास हे हत्याकांड घडले. गोवंडीतील करमण मामा नगरमध्ये कुटुंबासोबत राहात असलेले आदिल तालीम खान (३८) हे कारने जात असताना त्यांच्या कारची दुचाकीला धडक बसली. यात दुचाकीवर असलेली महिला जखमी झाली. आईला लागल्याच्या कारणावरून आरोपी दादू आणि पप्पू यांनी कार चालक आदिल खान यांच्याशी वाद घातला.
रात्री अकराच्या सुमारास दादू आणि पप्पू यांनी आदिल खान यांच्या घरी जात त्यांच्यावर चाकूने सपासप वार केले. आदिल खान हे गंभीर जखमी होऊन खाली कोसळताच दोघांनी तेथून पळ काढला. चाकू हल्ल्याच्या घटनेने परिसरात एकच खळबळ उडाली. कुटुंबीयांनी हल्ल्याची माहिती पोलिसांना देत जखमी अवस्थेतील आदिल यांना उपचारांसाठी तातडीने जवळच्या रुग्णालयात नेले; पण तोपर्यंत उशीर झाला होता.
