मुंबई : बिग बॉसच्या घरात अनेक गप्पा-गोष्टी, भांडणं होताना आपण पाहिली असतील. यानंतर सलमान खान काहींना फटकारतानाही दिसून आला. त्यातच आता या आठवड्यात दबंग सलमान खान अनेक घरातील सदस्यांना धडा शिकवणार आहे. शहनाज गिलचा भाऊ शेहबाजला अखेर सलमान खानने चांगलेच फटकारले. सलमानने फटकारल्यानंतर तो भावूक होताना दिसला.
शेहबाज हा बिग बॉस १९ मध्ये वाईल्ड कार्ड म्हणून दाखल झाला. शोमध्ये सामील झाल्यापासून शेहबाज प्रेक्षकांना त्याची मजेदार बाजू दाखवत आहे. तो बहुतेकदा विनोद करताना दिसतो. इतकेच नाहीतर भांडण्याच्या वेळीही शेहबाज कधीच गंभीर दिसत नाही. घरातील सदस्यांना त्याची विनोदी शैली मनोरंजक वाटते. पण आता परिस्थिती बदलताना दिसत आहे. विनोदाच्या नावाखाली घरातील सदस्यांना शेहबाज धमकावू लागला आहे. शेहबाजने शोमध्ये आक्रमक पवित्रा घेतल्याचे दिसून येत आहे. सलमान खानने त्याला फटकारले आणि मर्यादेत राहण्याची सूचना केली.
शोच्या प्रोमो व्हिडिओमध्ये सलमान खान रागाने शेहबाजला सांगताना दिसत आहे. मी एक गोष्ट स्पष्ट करू इच्छितो. तू नेहमीच विनोद करतोस…तू प्रेक्षकांना असभ्य आणि अत्यंत त्रासदायक दिसतोस. सलमान खानने फटकारल्यानंतर शेहबाज भावनिक झाला. आता याच एपिसोडची सगळीकडे चर्चा सुरु आहे.
