Beed Crime: बीड जिल्ह्यातील अंबाजोगाई येथे उच्च शिक्षणासाठी आलेल्या एका २० वर्षीय विद्यार्थिनीला ब्लॅकमेल करून तिच्यावर नराधमांनी अत्याचार केल्याची संतापजनक घटना समोर आली आहे. केज तालुक्यातील रहिवासी असलेली ही तरुणी अंबाजोगाईत शिकत असताना तिची ओळख महेश करपे आणि पवन कराड या दोन तरुणांशी झाली. मात्र, या ओळखीचा गैरफायदा घेत दोघांनी तिचा पाठलाग सुरू केला. एका दिवशी महेशने तरुणीला गाठून तिला जबरदस्तीने मंचुरियन खाण्यास भाग पाडले. या खाद्यपदार्थात आधीच गुंगीचे औषध मिसळलेले असल्याने तरुणी बेशुद्ध झाली आणि याचाच फायदा घेत दोघांनी तिच्यावर आळीपाळीने अत्याचार केला.
पुण्यात नेऊन छळ आणि ब्लॅकमेलिंगचा डाव
हा छळ एवढ्यावरच थांबला नाही, तर संशयित आरोपी पवन कराड याने तरुणीला पुन्हा गुंगीचे औषध देऊन पुण्याच्या एका लॉजवर नेले आणि तिथेही तिच्या असहायतेचा गैरफायदा घेतला. या नराधमांनी अत्याचारादरम्यानचे आक्षेपार्ह फोटो आणि व्हिडिओ मोबाईलमध्ये कैद केले होते. हे फोटो तिच्या कुटुंबीयांना दाखवून बदनामी करण्याची धमकी देत त्यांनी पीडितेकडे पैशांची मागणी सुरू केली. या भीतीपोटी तरुणीने वेळोवेळी तब्बल ३ लाख रुपयांची रोकड आणि साडे नऊ तोळे सोन्याचे दागिने आरोपींच्या हवाली केले.
आरोपी गजाआड, शहरात तीव्र संताप
सततच्या ब्लॅकमेलिंगला कंटाळून अखेर शनिवारी या पीडित तरुणीने अंबाजोगाई शहर पोलीस ठाण्यात धाव घेत घडलेला सर्व प्रकार पोलिसांना सांगितला. तक्रार दाखल होताच पोलिसांनी तत्परता दाखवत दोन्ही नराधम आरोपींना बेड्या ठोकल्या आहेत. आरोपींनी पोलिसांसमोर आपल्या गुन्ह्याची कबुली दिली असून पोलीस या प्रकरणाचा पुढील तपास करत आहेत. या अमानुष घटनेमुळे अंबाजोगाई शहरात महिलांच्या सुरक्षेचा प्रश्न पुन्हा ऐरणीवर आला असून नागरिकांमधून तीव्र संताप व्यक्त होत आहे.
