Death Threat: बॉलिवूडचा धुरंधर अभिनेता रणवीर सिंग आणि प्रसिद्ध दिग्दर्शक रोहित शेट्टी यांना लॉरेन्स बिश्नोई टोळीकडून पुन्हा एकदा जीवे मारण्याची धमकी मिळाली आहे. बिश्नोई टोळीचा गुंड हॅरी बॉक्सर याने या धमकीची जबाबदारी स्वीकारली असून, यावेळी केवळ कलाकारच नव्हे तर त्यांच्या मॅनेजरनाही लक्ष्य करण्याची ताकीद दिली आहे. रोहित शेट्टीच्या घरावर झालेल्या गोळीबारानंतर ही दुसरी मोठी धमकी असल्याने चित्रपटसृष्टीत घबराट पसरली आहे.
‘मॅनेजरना एकामागून एक संपवू’; धमकीचा धक्कादायक मजकूर
मिळालेल्या माहितीनुसार, रणवीर सिंगने रोहित शेट्टीला पोलीस तक्रार न करण्याचा सल्ला दिला होता, याच मुद्द्यावरून ही नवीन धमकी देण्यात आली आहे. “आम्हाला तुमच्या सर्व मॅनेजरची माहिती आहे, ते कुठे राहतात आणि कधी येतात-जातात हे सर्व आम्हाला माहित आहे. जर तुम्ही तुमचे मार्ग सुधारले नाहीत, तर आम्ही एकामागून एक तुमच्या मॅनेजरना संपवण्यास सुरुवात करू,” असे या धमकीत म्हटले आहे. तसेच, हॅरी बॉक्सरने पोर्तुगालमधील एका गोळीबाराच्या घटनेची जबाबदारीही स्वीकारल्याचे समोर आले आहे.
मुंबई पोलिसांची सावध भूमिका; एआय (AI) चा संशय
या ऑडिओ धमकीबाबत मुंबई पोलिसांच्या गुन्हे शाखेने सावध पवित्रा घेतला आहे. पोलिसांनी स्पष्ट केले आहे की, या ऑडिओ मेसेजचा प्राथमिक स्रोत मीडिया आहे. आजकाल ‘आर्टिफिशियल इंटेलिजन्स’ (AI) चा वापर करून बनावट ऑडिओ मेसेज तयार करण्याचे प्रमाण वाढले आहे. त्यामुळे हा मेसेज खरोखरच बिश्नोई टोळीचा आहे की एखाद्या ‘कॉपीकॅट’ गुन्हेगाराने खोडसाळपणा केला आहे, याचा तपास पोलीस करत आहेत.
तपास आणि सुरक्षा यंत्रणा सतर्क
व्हायरल झालेला हा ऑडिओ मेसेज सध्या पोलिसांच्या देखरेखीखाली असून त्याची तांत्रिक तपासणी केली जात आहे. मुंबई पोलिसांनी यापूर्वीच स्पष्ट केले आहे की, सोशल मीडियामुळे अशा धमक्यांना व्यासपीठ मिळते, ज्यामुळे भीतीचे वातावरण निर्माण होते. मात्र, वरिष्ठ अधिकाऱ्यांनी या प्रकरणाची सखोल चौकशी करण्याचे आदेश दिले असून रणवीर सिंग आणि रोहित शेट्टी यांच्या सुरक्षिततेचा आढावा घेतला जात आहे.
