T20 World Cup 2026: T20 विश्वचषक 2026 मधील 19 व्या सामन्यात झिम्बाब्वेने बलाढ्य ऑस्ट्रेलियाचा 10 धावांनी पराभव करून क्रिकेट विश्वात खळबळ उडवून दिली आहे. 18 वर्षांनंतर झिम्बाब्वेने ऑस्ट्रेलियाविरुद्ध मिळवलेला हा पहिलाच विश्वचषक विजय आहे; यापूर्वी 2007 मध्ये त्यांनी कांगारूंना पराभूत केले होते. झिम्बाब्वेने विजयासाठी दिलेल्या 170 धावांच्या लक्ष्याचा पाठलाग करताना ऑस्ट्रेलियाचा संघ पूर्णपणे कोलमडला आणि 146 धावांवर सर्वबाद झाला. या स्पर्धेतील हा आतापर्यंतचा सर्वात मोठा धक्का मानला जात आहे.
ब्रायन बेनेटचे शानदार अर्धशतक
या सामन्यात प्रथम फलंदाजी करताना झिम्बाब्वेची सुरुवात भक्कम झाली. सलामीवीर ब्रायन बेनेटने 56 चेंडूत नाबाद 64 धावांची मॅचविनिंग खेळी खेळली, ज्यात 7 चौकारांचा समावेश होता. त्याला मारुमानी (35 धावा) आणि रायन बर्ल (35 धावा) यांनी चांगली साथ दिली. अखेरच्या षटकांत कर्णधार सिकंदर रझाने आक्रमक पवित्रा घेत 13 चेंडूत नाबाद 25 धावा कुटल्या, ज्यामुळे झिम्बाब्वेला सन्मानजनक धावसंख्या उभारता आली.
ऑस्ट्रेलियाची फलंदाजी गडगडली; मॅट रेनशॉची झुंज अपुरी
धावांचा पाठलाग करताना ऑस्ट्रेलियाची अवस्था अत्यंत बिकट झाली होती. अवघ्या 29 धावांत त्यांचे 4 महत्त्वाचे फलंदाज तंबूत परतले होते. मॅट रेनशॉने सर्वाधिक 65 धावा करत एका बाजूने किल्ला लढवला, तर ग्लेन मॅक्सवेलने 31 धावा केल्या. मात्र, कॅमेरॉन ग्रीन आणि टिम डेव्हिड शून्य धावांवर बाद झाल्याने कांगारूंच्या आशेवर पाणी फिरले. जोश इंग्लिससह 7 फलंदाजांना तर दुहेरी धावसंख्याही गाठता आली नाही. झिम्बाब्वेकडून ब्लेसिंग मुझाराबानीने 4 आणि ब्रॅड इव्हान्सने 3 बळी घेऊन विजयात मोलाचा वाटा उचलला.
ग्रुप B मधील समीकरणे बदलली
या पराभवानंतर ऑस्ट्रेलियाचा संघ पॉइंट्स टेबलमध्ये 3rd स्थानावर फेकला गेला आहे. त्यांचे सध्या 2 गुण असून पुढील फेरीत जाण्यासाठी त्यांना आता श्रीलंका आणि ओमानविरुद्धचे सामने जिंकणे अनिवार्य झाले आहे. झिम्बाब्वेच्या या विजयामुळे ग्रुप B मधील स्पर्धा आता अधिकच रोमांचक व अटीतटीची झाली आहे.
