नांदेड : भाजपाचे खासदार अशोकराव चव्हाण यांचे मेहुणे आणि काँग्रेसचे नेते माजी खासदार भास्करराव पाटील खतगावकर हे राष्ट्रवादीत प्रवेश करणार आहेत. भास्करराव पाटील खतगावकर यांच्यासोबतच मीनल खतगावकर यादेखील राष्ट्रवादीत प्रवेश करणार असल्याची माहिती समोर येत आहे. खतगावकर यांच्या सुनबाई मीनल खतगावकर यांनी काँग्रेसच्या तिकिटावर नायगाव विधानसभा निवडणूक लढवली होती. त्यात त्या पराभूत झाल्या होत्या. त्यामुळे त्यांनी पक्ष सोडण्याच्या हालचाली सुरु केल्याचे समजते.
कोण आहेत भास्करराव पाटील खतगावकर?
माजी खासदार भास्करराव पाटील खतगावकर हे माजी मुख्यमंत्री आणि सध्याचे राज्यसभा खासदार अशोक चव्हाण यांचे सख्खे दाजी आहेत. खतगावकर हे तीन वेळेस आमदार आणि तीन वेळेस खासदार राहिले आहेत. 2014 मध्ये त्यांनी काँग्रेस सोडून भारतीय जनता पक्षामध्ये प्रवेश केला होता. नंतर पुन्हा ते काँग्रेसमध्ये परत आले. 2024 च्या लोकसभा निवडणुकीपूर्वी अशोक चव्हाण हे काँग्रेस सोडून भाजपमध्ये दाखल झाल्यानंतर भास्करराव पाटील खतगावकर हे देखील काँग्रेस सोडून भाजपमध्ये आले होते. खतगावकर यांनी विधानसभा निवडणुकीदरम्यान पुन्हा पक्ष बदलला. काँग्रेसमध्ये परत येऊन त्यांनी आपली स्नुषा डॉ. मीनल पाटील-खतगावकर यांना नायगाव मतदारसंघातून काँग्रेसची उमेदवारी देखील मिळवून दिली. मात्र, डॉ. मीनल पाटील खतगावकर यांना पराभवाला सामोरे जावे लागले.
