Cabinet Expansion : केंद्रातील पंतप्रधान नरेंद्र मोदी यांच्या मंत्रिमंडळात लवकरच फेरबदल होण्याची चर्चा पुन्हा एकदा जोर धरू लागली आहे. दिल्लीतील राजकीय वर्तुळात केंद्रीय मंत्रिमंडळ विस्तारासंदर्भातील चर्चा अंतिम टप्प्यात असल्याचे बोलले जात असून, अधिकृत घोषणा कधीही होऊ शकते, अशी शक्यता व्यक्त केली जात आहे. मात्र, याबाबत सरकारकडून अद्याप कोणतीही अधिकृत घोषणा करण्यात आलेली नाही.
मिळालेल्या माहितीनुसार, भाजपने मित्रपक्षांसोबत मंत्रिमंडळ विस्ताराबाबत चर्चा पूर्ण केली असून नव्या आणि तरुण चेहऱ्यांना संधी देण्यावर भर दिला जाऊ शकतो. त्यामुळे महाराष्ट्रासह विविध राज्यांतील खासदारांच्या नावांची जोरदार चर्चा सुरू आहे.
महाराष्ट्रातून कोणाला संधी?
राजकीय चर्चांनुसार, शिवसेनेकडून खासदार श्रीकांत शिंदे यांना केंद्रीय मंत्रिमंडळात स्थान मिळू शकते, अशी शक्यता व्यक्त केली जात आहे. याशिवाय विनोद तावडे आणि इतर काही नेत्यांचीही नावे चर्चेत आहेत.
तसेच, अलीकडेच शिवसेनेत दाखल झालेले खासदार संजय दिना पाटील यांनाही महत्त्वाचे खाते मिळू शकते, अशी राजकीय चर्चा सुरू आहे. काही वृत्तांनुसार, विद्यमान केंद्रीय राज्यमंत्री प्रतापराव जाधव यांच्याकडील आरोग्य खात्यात बदल होऊ शकतो, तर आयुष खाते त्यांच्याकडेच कायम राहण्याची शक्यता वर्तवली जात आहे. मात्र, याबाबत कोणतीही अधिकृत पुष्टी झालेली नाही.
कोणत्या मंत्र्यांबाबत चर्चा?
राजकीय वर्तुळात केंद्रीय मंत्री धर्मेंद्र प्रधान आणि हरदीप सिंग पुरी यांच्या खात्यांमध्ये बदल होऊ शकतो किंवा त्यांना मंत्रिमंडळातून वगळले जाऊ शकते, अशी चर्चा आहे.
तसेच, अर्थमंत्री निर्मला सीतारामन यांच्याकडील अर्थ खात्याबाबतही विविध तर्कवितर्क सुरू आहेत. मात्र, सरकार किंवा भाजपकडून यासंदर्भात कोणतेही अधिकृत संकेत देण्यात आलेले नाहीत.
नव्या चेहऱ्यांची चर्चा
श्रीकांत शिंदे
अनुराग ठाकूर
शक्तिकांत दास
अरुण गोविल
विनोद तावडे
याशिवाय, काही वृत्तांमध्ये राघव चड्ढा किंवा अशोक मित्तल यांपैकी एका नेत्याला मंत्रिमंडळात स्थान मिळण्याची शक्यता व्यक्त करण्यात आली आहे. मात्र, हे दावे अधिकृतरीत्या पुष्टी झालेले नाहीत.
निवडणुकांच्या पार्श्वभूमीवर रणनीती
उत्तर प्रदेशसह अनेक राज्यांतील आगामी विधानसभा निवडणुका लक्षात घेऊन भाजप सामाजिक, प्रादेशिक आणि राजकीय समतोल साधण्याचा प्रयत्न करत असल्याची चर्चा आहे. त्यामुळे मंत्रिमंडळ विस्तारात विविध राज्यांना प्रतिनिधित्व देण्यावर भर दिला जाऊ शकतो.
