पुणे : प्रवासी वाहतूक करणाऱ्या खासगी बसच्या टपावरुन पडल्याने क्लिनरचा मृत्यू झाल्याची घटना गणेशखिंड रस्त्यावर पुणे विद्यापीठाजवळ घडली. या अपघातास जबाबदार ठरल्याप्रकरणी बसचालकाला चतु:शृंगी पोलिसांनी बेड्या ठोकल्या आहेत. संकेत देवीदास चैलवाल (वय २९, रा. मासोद, जि. अमरावती) असे मृत्युमुखी पडलेल्या क्लिनरचे नाव आहे. बबलू हमीदमियाँ मक्तेवाले (वय ३३, रा. हुडगी, जि. बिदर, कर्नाटक) याला अटक करण्यात आलेल्या बस चालकाचे नाव आहे. याप्रकरणी पोलीस कर्मचारी विकास इंगळे यांनी चतु:शृंगी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, प्रवासी वाहतूक करणारी खासगी बस गणेशखिंड रस्त्याने शुक्रवारी पहाटे सव्वाचारच्या सुमारास मुंबईहून हैद्राबादकडे निघाली होती. गणेशखिंड रस्त्यावर असलेल्या वैकुंठभाई मेहता संस्थेजवळ कमान आहे. या कमानीजवळ लटकणारी वायर बसच्या टपावर अडकल्याने बसमधील क्लिनर संकेत याला बसचालक बबलू याने टपावर अडकलेली वायर काढण्यास सांगितले.
बसचालक बबलू याने गणेशखिंड रस्त्यावर बस थांबवली. त्यानंतर संकेत टपावर चढला. सदर बस कमानीतून बाहेर नेत असताना बबलू याने अचानक जोरात ब्रेक दाबला, त्यामुळे टपावर चढलेल्या संकेतचा तोल जाऊन तो रस्त्यात पडला. यामध्ये त्याच्या डोक्याला गंभीर दुखापत झाली. या अपघाताची माहिती मिळताच पोलीस उपनिरीक्षक शामल पाटील यांनी घटनास्थळी भेट दिली. संकेतला रुग्णालयात दाखल करण्यात आले, परंतु, उपचारांपूर्वीच त्याचा मृत्यू झाला होता.
पोलिसांनी केलेल्या चौकशीत बसचालक बबलूने बसचा ब्रेक दाबल्याने टपावरुन पडल्याची माहिती मिळाली. अपघातास जबाबदार ठरल्याप्रकरणी बसचालक बबलू याला अटक करण्यात आली. पोलीस उपनिरीक्षक शामल पाटील पुढील तपास करत आहेत.
