Political News : केंद्र सरकारमध्ये मोठ्या राजकीय घडामोडींची चर्चा सुरू झाली असून पंतप्रधान नरेंद्र मोदी यांच्या मंत्रिमंडळात लवकरच फेरबदल होण्याची शक्यता व्यक्त केली जात आहे. ही चर्चा केंद्रीय मंत्री जॉर्ज कुरियन यांच्या राजीनाम्यानंतर अधिक तीव्र झाली आहे.
राष्ट्रपती द्रौपदी मुर्मू यांनी जॉर्ज कुरियन यांचा राजीनामा स्वीकारल्यानंतर राजकीय वर्तुळात विविध अटकळी सुरू झाल्या आहेत. त्यांच्या राज्यसभेतील कार्यकाळ संपल्यानंतर त्यांना पुन्हा संधी न मिळाल्याने हा निर्णय अपेक्षित मानला जात आहे.
सूत्रांच्या माहितीनुसार, आगामी पावसाळी अधिवेशनापूर्वी केंद्र सरकारमध्ये मंत्रिमंडळ फेरबदल होण्याची शक्यता आहे. काही मंत्र्यांच्या जागा रिक्त होण्याची शक्यता असल्याने नवीन नेत्यांना संधी दिली जाऊ शकते, अशी चर्चा आहे.
दरम्यान, जॉर्ज कुरियन यांना भविष्यात राज्यपालपदाची जबाबदारी मिळू शकते, अशीही राजकीय वर्तुळात चर्चा आहे. तसेच विविध राज्यांतील राजकीय समिकरणे बदलल्यामुळे एनडीएच्या प्रतिनिधित्वातही बदल होण्याची शक्यता व्यक्त केली जात आहे.
पश्चिम बंगाल आणि महाराष्ट्रातील राजकीय घडामोडींमुळेही मंत्रिमंडळातील समतोल साधण्यासाठी फेरबदल होऊ शकतो, असेही बोलले जात आहे. मात्र, अद्याप याबाबत कोणतीही अधिकृत घोषणा करण्यात आलेली नाही.
येत्या काही आठवड्यांत केंद्रातील राजकारणात महत्त्वाचे बदल दिसू शकतात, अशी शक्यता राजकीय विश्लेषकांकडून व्यक्त केली जात आहे.
