Buldhana Family Suicide: घरगुती वादाचे पर्यवसन किती भयंकर आणि जीवघेणे ठरू शकते, याचा एक अत्यंत हृदयद्रावक आणि मन सुन्न करणारा प्रकार बुलढाणा जिल्ह्यातून समोर आला आहे. जळगाव जामोद तालुक्यातील राजुरा धरण परिसरात एका विहिरीत वडील आणि त्यांच्या चार लहान मुलांचे मृतदेह आढळून आल्याने संपूर्ण विदर्भ हादरला आहे. एका पित्याने आपल्या चारही निष्पाप मुलांना विहिरीत ढकलून दिल्यानंतर स्वतःही विहिरीत उडी घेऊन आत्महत्या केली.
किरकोळ कौटुंबिक वादातून भयंकर पाऊल
मिळालेल्या प्राथमिक माहितीनुसार, भाले अंजन गावातील रहिवासी विजय मुसा किराडिया (आदिवासी समाज) याच्या घरात काल पत्नीसोबत काही घरगुती वाद झाला होता. या भांडणामुळे त्याची पत्नी रागाने माहेरी निघून गेली होती. आज सकाळी विजय घरात एकटाच काम करत असताना, त्याच्या वडिलांनी त्याला सहज विचारले, “तू स्वतः घरकाम का करतोयस? तुझी बायको कुठे गेली?” वडिलांच्या या प्रश्नावर विजयला प्रचंड राग आला. आधीच पत्नीशी झालेल्या वादामुळे मानसिक तणावात असलेल्या विजयचा संयम सुटला. यानंतर त्याने एक भयंकर निर्णय घेतला.
विहिरीतून काढले पाचही मृतदेह
रागाच्या भरात विजय आपल्या चारही मुलांना सोबत घेऊन घराबाहेर पडला. त्याने राजुरा धरण परिसरातील एक विहीर गाठली आणि आपल्या चार मुलांना थेट विहिरीत फेकून दिले. मुले पाण्यात बुडाल्यानंतर त्याने स्वतःही विहिरीत झोकून दिले. या दुर्दैवी घटनेत मृत पावलेल्या मुलांची नावे खालीलप्रमाणे आहेत:
- प्रित किराडिया
- प्राची किराडिया
- पूर्वी किराडिया
- पियुष किराडिया
घटनेची माहिती मिळताच जळगाव जामोद पोलीस आणि स्थानिक प्रशासनाने तातडीने राजुरा धरण परिसरात धाव घेतली. विहिरीतून पाचही जणांचे मृतदेह बाहेर काढण्यात आले असून ते शवविच्छेदनासाठी जळगाव जामोद येथील ग्रामीण रुग्णालयात पाठवण्यात आले आहेत.
परिसरात शोककळा
एकाच वेळी घरातील पाच जणांचा, विशेषतः चार निष्पाप चिमुरड्यांचा अशा क्रूर पद्धतीने अंत झाल्याने भाले अंजन आणि राजुरा गावावर शोककळा पसरली आहे. एका संतापाच्या भरात संपूर्ण हसतेखेळते कुटुंब उद्ध्वस्त झाले आहे. या धक्कादायक प्रकरणाचा पुढील तपास जळगाव जामोद पोलीस करत आहेत.
