Mumbai Pune Expressway Accident: मुंबई-पुणे द्रुतगती मार्गावर (Expressway) आज सोमवारी पहाटेच्या सुमारास एक अत्यंत भीषण आणि काळजाचा ठोका चुकवणारी दुर्घटना घडली. पुणे बाजूकडून मुंबईकडे जाणाऱ्या महामार्गावर ट्रक, तेल वाहून नेणारा कंटेनर आणि एका कारमध्ये तिहेरी धडक झाली. या भीषण अपघातात ट्रक चालक आणि क्लिनर यांचा जागीच दुर्दैवी मृत्यू झाला, तर अन्य तीन जण गंभीर जखमी झाले आहेत. अपघातामुळे महामार्गावर मोठ्या प्रमाणात वाहतूक कोंडी झाली होती.
नियंत्रण सुटले अन्… कसा घडला अपघात?
मिळालेल्या माहितीनुसार, पुण्याहून मुंबईच्या दिशेने तांदळाची पोती घेऊन जाणारा एक भरधाव ट्रक पहाटेच्या सुमारास खालापूर टोलनाक्याच्या आधी आला असता, चालकाचे वाहनावरील नियंत्रण सुटले. नियंत्रणाबाहेर गेलेल्या या ट्रकने पुढे चाललेल्या खाद्य तेलाच्या कंटेनरला पाठीमागून जोरदार धडक दिली. हा आघात एवढा भीषण होता की, शेजारून जाणाऱ्या ‘एर्टिगा’ कारलाही या वाहनांनी कचाट्यात घेतले. धडकेनंतर तांदळाचा ट्रक आणि ऑईल कंटेनर दोन्ही महामार्गावरच पलटी झाले.
महामार्गावर चारही लेन ठप्प; तेल-तांदळाचा सडा
अपघातानंतर ट्रकमधील तांदळाची पोती फाटून तांदूळ आणि कंटेनरमधील खाद्य तेल रस्त्यावर मोठ्या प्रमाणावर सांडले. रस्ता तेलकट झाल्यामुळे इतर वाहनांचा घसरण्याचा धोका निर्माण झाला होता. परिणामी, मुंबईकडे जाणाऱ्या चारही लेनवरील वाहतूक काही काळासाठी पूर्णपणे ठप्प झाली आणि वाहनांच्या लांबच लांब रांगा लागल्या.
