Maharashtra Monsoon : गेल्या काही दिवसांपासून राज्यातील अनेक जिल्हे पावसाच्या प्रतीक्षेत असून शेतकरी चिंतेत होते. मात्र, आता शेतकरी बांधवांसाठी आनंदाची बातमी समोर आली आहे. हवामान विभागाने वर्तवलेल्या अंदाजानुसार, येत्या २० तारखेपासून राज्यात मान्सून पुन्हा एकदा सक्रिय होणार असून, पावसाचा जोर वाढणार आहे.
पावसाचा नवा अंदाज
हवामान अभ्यासक पंजाबराव डख यांनी वर्तवलेल्या नवीन अंदाजानुसार, २१ जून ते ३० जून या कालावधीत राज्यात जोरदार पावसाची शक्यता आहे. या आठ दिवसांच्या कालावधीत संपूर्ण राज्यात पावसाचे आगमन होईल.
पावसाचा प्रवास कसा असेल?
- हा पाऊस विदर्भामधून सुरू होईल, असा अंदाज आहे.
- त्यानंतर मराठवाडा आणि उत्तर महाराष्ट्रसह पावसाचा जोर हळूहळू संपूर्ण राज्यामध्ये पसरेल.
- हा पाऊस सर्वत्र एकाच वेळी होणार नाही, तर वेगवेगळ्या दिवशी वेगवेगळ्या भागांमध्ये हजेरी लावत संपूर्ण राज्य व्यापून टाकेल.
राज्यात मान्सूनचे आगमन होऊन काही दिवस उलटले असले तरी, अनेक ठिकाणी उष्णतेची लाट कायम होती. मात्र, आता हा आगामी मुसळधार पाऊस उकाड्यापासून मोठा दिलासा देणारा ठरणार आहे. नदी-नाल्यांना पूर येण्याची शक्यता असल्याने संबंधित प्रशासनाने आणि नागरिकांनी सतर्क राहण्याचे आवाहन या हवामान बदलांच्या पार्श्वभूमीवर करण्यात आले आहे.
