मुंबई: मुंबईत आज भयानक प्रकार उघडकीस आला आहे. अभिनय शिकवण्याच्या नावाखाली मुलांना ओलीस ठेवण्याची धक्कादायक घटना आर ए स्टुडिओमध्ये घडली आहे. या स्टुडिओत गेल्या काही दिवसांपासून ऑडिशन आणि शूटिंग सुरू होते. मात्र, गुरुवारी सकाळी अचानक एका यूट्यूबरने स्टुडिओतील १५ ते २० मुलांना खोलीत बंद करून ठेवले, ज्यामुळे परिसरात मोठी खळबळ उडाली.
घटनेची माहिती मिळताच पोलीस आणि अग्निशमन दल घटनास्थळी दाखल झाले. पोलिसांनी तत्काळ कारवाई करत सर्व मुलांची सुरक्षित सुटका केली. तसेच आरोपीला ताब्यात घेतले. मुलांना ओलीस ठेवणाऱ्याचं नाव रोहित आर्य असं सांगितलं जात आहे. तो स्वतःचा यूट्यूब चॅनल चालवतो आणि काही दिवसांपासून मानसिक तणावात होता, अशी माहिती मिळाली आहे.
रोहित आर्यने सोशल मीडियावर व्हिडिओ टाकून म्हटलं, ‘मी दहशतवादी नाही, माझ्या काही मागण्या आहेत. मला संवाद साधायचा आहे आणि काही लोकांना प्रश्न विचारायचे आहेत. त्याने सर्वांचं लक्ष वेधण्यासाठी मुलांना ओलीस ठेवण्याचं पाऊल उचलल्याचंही सांगितलं.
हेही वाचा –ताम्हिणी घाटात दरड कोसळली! कारच्या सनरुफमधून दगड डोक्यात पडल्याने महिलेचा जागीचं मृत्यू
या संपूर्ण घटनेनंतर आर ए स्टुडिओ परिसरात मोठी गर्दी झाली होती. पोलिसांनी सावधगिरीने कारवाई करत कोणतीही जीवितहानी होऊ दिली नाही. सध्या आरोपी रोहित आर्यला चौकशीसाठी पोलिसांनी ताब्यात घेतले असून, या घटनेचा पुढील तपास सुरू आहे.
