लातूर: लातूर – औसा रोडवर बेलकुंडी गावाजवळ झालेल्या भीषण अपघातात भारतीय जनता पक्षाचे माजी आमदार आर. टी. देशमुख यांचा जागीच मृत्यू झाला आहे. हा अपघात सोमा (दि. २६) दुपारी पाच वाजेच्या दरम्यान झाल्याची माहिती मिळत आहे.
मिळालेल्या माहितीनुसार, माजी आमदार देशमुख हे औसाकडे चारचाकी गाडीतून येत होते. बेलकुंडीजवळ उड्डाणपुलाच्या जवळ आल्यानंतर चालकाचे नियंत्रण सुटले आणि गाडी उलटली. या अपघातात देशमुख गंभीररित्या जखमी झाले. त्यांना तात्काळ उपचारासाठी रुग्णालयात घेऊन जात असताना वाटेतच त्यांचा मृत्यू झाला. हा अपघात एवढा भीषण होता की, गाडीचा अक्षरशः चेंदामेंदा झाला आहे.
आर. टी. देशमुख हे माजलगाव मतदारसंघाचे माजी आमदार आहेत. सामाजिक व राजकीय क्षेत्रात त्यांचे मोठे योगदान राहिले आहे. त्यांच्या निधनाने एक अनुभवी व प्रगल्भ नेता हरपल्याची भावना नागरिकांकडून व्यक्त होत आहे.
उड्डाणपुलाच्या दुभाजकाचे कठडे गाडीने तोडले
चालकाचे नियंत्रण सुटल्यानंतर देशमुख यांची गाडी रस्त्याच्या बाजूला उलटली. गाडीने दोन ते तीन पलट्या घेतल्याची माहिती मिळत आहे. चालक आणि माजी आमदार देशमुख दोघेही गंभीर जखमी झाले. त्यावेळी रस्त्यावरील वाहनधारकांनी धाव घेत दोघांना गाडीबाहेर काढले. गंभीर जखमी झालेल्या देशमुख यांना तत्काळ उपचारासाठी दाखल करण्यात आले. मात्र, रस्त्यात असताना त्यांचा मृत्यू झाला.
