नवी दिल्ली: देशातील सर्वात मोठी ट्रॅव्हल एजन्सी कॉक्स अँड किंग्जने पाकिस्तानचे मित्र राष्ट्र तुर्की, अझरबैजान आणि उझबेकिस्तान यांच्याविरुद्ध मोठे पाऊल उचलले आहे. एजन्सीने या तीन देशांमध्ये नवीन प्रवास सेवांवर तात्पुरती बंदी घातली आहे. भारत आणि पाकिस्तानमधील वाढता तणाव आणि ग्राहकांच्या भावना लक्षात घेऊन कंपनीने हा निर्णय घेतला आहे.
कंपनीकडून एक निवेदन जारी
कॉक्स अँड किंग्जच्या संचालकांनी एक निवेदन जारी करून म्हटले आहे की, “अलीकडील घडामोडी लक्षात घेता, आम्ही सध्या अझरबैजान, उझबेकिस्तान आणि तुर्की येथे नवीन प्रवास सेवा बंद करण्याचा निर्णय घेतला आहे. हा निर्णय आमच्यासाठी आणि आमच्या देशवासियांसाठी अत्यंत महत्त्वाच्या असलेल्या तत्त्वांप्रती आमची वचनबद्धता दर्शवितो.” ते पुढे म्हणाले की, या देशांमध्ये अनावश्यक प्रवास टाळा आणि परिस्थिती सुधारेपर्यंत वाट पहा.
पाकिस्तानच्या पाठिंब्यानंतर एजन्सीने निर्णय घेतला
खरं तर, मंगळवार-बुधवार रात्री उशिरा भारताने पाकिस्तानविरुद्ध ‘ऑपरेशन सिंदूर’ सुरू केले होते. या काळात भारताने पाकव्याप्त काश्मीरसह ९ ठिकाणी हवाई हल्ले केले. भारताच्या या कृतीनंतर, तुर्की आणि अझरबैजानने बुधवारी पाकिस्तानला पाठिंबा देणारे निवेदन जारी केले. दुसरीकडे, उझबेकिस्तानने दोन्ही देशांमध्ये शांततेचे आवाहन केले होते. परंतु, पहलगाम हल्ल्यानंतर, उझबेकिस्तानच्या उपपरराष्ट्रमंत्र्यांनी पाकिस्तानी राजदूतांची भेट घेतली, ज्यामुळे या विधानावर प्रश्नचिन्ह उपस्थित होत आहे.
