मुंबई: राज्याचे ग्रामविकास मंत्री जयकुमार गोरे यांच्यावर साताऱ्यातील एका महिलेने छळ केल्याचा गंभीर आरोप केला होता. हे 2016 मधील प्रकरण असून गोरे यांनी स्वत:चे नग्न फोटो पाठवले असल्याचा आरोप महिलेने केला होता. यामुळे मंत्री असलेले गोरे हे चांगलेच चर्चेत आले होते. मात्र, जयकुमार गोरे यांच्यावर आरोप करणाऱ्या महिलेला एक कोटीची खंडणी घेताना सातारा पोलिसांनी नुकतीच अटक केली आहे. आता या प्रकरणावरून मुख्यमंत्री देवेंद्र फडणवीस यांनी विधानसभेत राष्ट्रवादी शरद पवार गटाच्या खासदार सुप्रिया सुळे आणि आमदार रोहित पवार यांच्यावर गंभीर आरोप केले आहेत.
आतापर्यंत या प्रकरणात चार तक्रारी झाल्या आहेत. संबंधित महिला सरसेनापती हंबीरराव मोहिते यांच्या घराण्यातील आहे, असा खोटा प्रचार करण्यात आला. या प्रकरणात तीन लोकांना अटक करण्यात आली आहे. यामध्ये एक महिला, दुसरा तुषार खरात आणि तिसरा अनिल सुभेदार आहे. या सर्वांनी मिळून हा कट रचला. याप्रकरणी सर्व पुरावे सापडले आहेत. त्यांचे व्हॉट्सॲपवरचे संभाषण सापडले आहे. परंतु, दुर्दैवाची गोष्टी पुढची आहे की, या सर्वांशी राष्ट्रवादी काँग्रेस शरद पवार गटाचे लोक असल्याचे दिसून आले आहे. मी हे पुराव्यानिशी सांगत आहे. प्रभाकरराव देशमुख हे थेट तिन्ही आरोपींशी बोललेले आहेत. मला वाईट वाटतं ते म्हणजे सुप्रिया सुळे आणि रोहित पवार यांचे कॉल्स तुषार खरात आहेत, असं देखील देवेंद्र फडणवीस म्हणाले. गोरे यांच्याविरुद्ध जे व्हिडिओ केले आहेत, ते व्हिडिओ त्यांनी सुळे आणि पवार यांना पाठवले आहेत. आता सर्व गोष्टींची चौकशी होणार आहे. हे नेमकं काय चाललं आहे. आपण सर्व राजकीय शत्रू नाही, राजकीय विरोधक आहोत, अशाप्रकारे कोणाला जीवनातून उठवणे चुकीचे आहे, असंही मुख्यमंत्री देवेंद्र फडणवीस यांनी म्हटले आहे.
