मुंबई: महिला प्रीमिअर लीगचा तिसरा हंगाम संपण्याच्या मार्गावर पोहोचला आहे. आज (दि. १५) या स्पर्धेचा अंतिम सामना मुंबईच्या ब्रेबॉर्न स्टेडियमवर दिल्ली कॅपिटल्स व मुंबई इंडियंन्स यांच्यात खेळला जाणार आहे. हा सामना जिंकून दिल्ली विजेतेपदाचा दुष्काळ संपविणार की मुंबई दुसऱ्यांदा विजेतेपदाचा चषक उंचावणार याकडे सर्वांचे लक्ष लागले आहे.
आंतरराष्ट्रीय क्रिकेटमधून निवृत्ती घेतलेली मेग लँनिंग महिला क्रिकेटमधील सर्वात यशस्वी कर्णधारांपैकी एक आहे. ती व तिचा संघ पहिला डब्ल्यूपीएलचा किताब जिंकण्यासाठी आपल्याकडून कोणतीही कसर सोडणार नाही. दिल्लीच्या पुरुष संघालाही आतापर्यंत आयपीएलचे विजेतेपद जिंकण्यात अपयश आले आहे. दिल्लीच्या संघाने चांगल्या नेट रनरेटच्या आधारावर अंतिम फेरीत थेट प्रवेश केला आहे. तर मुंबईच्या संघाने एलिमिनिटेरमध्ये गुजरात जायंट्सला पराभूत करत विजेतेपदाच्या लढतीत प्रवेश केला आहे.
या सामन्यात दिल्ली आपल्या विजेतेपदाचा दुष्काळ संपविण्याच्या लक्ष्यासह मैदानावर उतरेल, तर मुंबईची नजर दुसऱ्यांदा चषक उंचावण्यावर असेल. हरमनप्रीत कौरच्या नेतृत्वाखालीले संप डब्ल्यूपीएलच्या पहिल्या सत्रात विजेता ठरला होता. त्यांनी दिल्लीला पराभूत करत विजेतेपद आपल्या नावे केले होते, आता पुन्हा एकदा दोन्ही संघ आमने-सामने असणार आहेत.
एलिमिनेटर सामन्यात मुंबईची गुजरातवर मात
या स्पर्धेचा एलिमिनेटर सामना गुरुवारी मुंबई इंडियन्स व गुजरात जायंट्स यांच्यात ब्रेबॉर्न स्टेडियमवर झाला. यामध्ये गुजरातने नाणेफेक जिंकून प्रथम गोलंदाजी स्वीकारली यानंतर मुंबईने प्रथम फलंदाजी करताना हिली मॅथ्यूज व नॅट सिव्हर बंट यांच्या प्रत्येकी ७७ धावांच्या खेळीच्या जोरावर २० षटकांत ४ बाद २१३ धावा केल्या. यानंतर लक्ष्याचा पाठलाग करताना गुजरातचा डाव १९.२ षटकांत १६६ धावावर संपुष्टात आला व मुंबईने ४७ धावांनी हा सामना जिंकत स्पर्धेची अंतिम फेरी गाठली. गुजरातकडून गिब्सनने सर्वाधिक ३४ धावांचे योगदान दिले. तर मुंबईकडून मॅथ्यूजने ३१ धावांच्या मोबदल्यात सर्वाधिक ३ गडी बाद केले. सामनावीरचा पुरस्कार हिली मॅथ्यूजला देण्यात आला.
