पुणे: देशाचे पंतप्रधान नरेंद्र मोदी यांच्या अत्यंत महत्त्वपूर्ण मुंबई दौऱ्यावेळी शिरूर-हवेली विधानसभा मतदारसंघाचे आमदार ज्ञानेश्वर कटके यांना मुंबई आंतरराष्ट्रीय विमानतळावर पंतप्रधानांच्या स्वागतासाठी उपस्थित राहण्याची गौरवशाली संधी लाभली.
ही संधी राष्ट्रवादी काँग्रेस पक्षाचे राष्ट्रीय अध्यक्ष तथा महाराष्ट्र राज्याचे उपमुख्यमंत्री अजित पवार, प्रदेशाध्यक्ष सुनिल तटकरे आणि ज्येष्ठ नेते प्रफुल्ल पटेल यांच्या माध्यमातून आमदार ज्ञानेश्वर कटके यांना मिळाली. पंतप्रधान मोदींच्या दौऱ्याचे औचित्य साधून राज्यातील विविध विकास प्रकल्प, पायाभूत सुविधा, आणि सार्वजनिक उपक्रमांचा आढावा घेण्यात येणार असल्याने संपूर्ण महाराष्ट्राचे लक्ष या दौऱ्याकडे लागले होते.
विमानतळावर पंतप्रधान नरेंद्र मोदींच्या स्वागतासाठी सुरक्षा यंत्रणांनी कडक बंदोबस्त ठेवला होता. पोलीस, विशेष संरक्षण पथक (SPG), तसेच मुंबई महानगरपालिकेच्या अधिकाऱ्यांची तातडीची तयारी सुरू होती. विमानतळावर स्वागतासाठी निवडक मान्यवरांना परवानगी देण्यात आली होती.
पंतप्रधान मोदींच्या विमानाचे आगमन होताच वातावरणात उत्साह, अपेक्षा आणि अभिमानाचे तरंग पसरले. विमानातून उतरल्यावर पंतप्रधान नरेंद्र मोदींनी आमदार कटके यांनी पारंपरिक भारतीय संस्कृतीनुसार ‘नमस्कार’ करून स्वागत केले. या प्रसंगी त्यांच्या चेहऱ्यावर दिसणारा आनंद, समाधान आणि अभिमान याचे दर्शन उपस्थित प्रत्येकाला घडले.
यावेळी आमदार हिरामण खोसकर, महाराष्ट्र राज्याचे मुख्य सचिव राजेश कुमार, तसेच महाराष्ट्र राज्याच्या पोलीस महासंचालक रश्मी शुक्ला उपस्थित होत्या. स्वागतानंतर पंतप्रधान मोदींनी थोडक्यात सर्व मान्यवरांशी संवाद साधला आणि महाराष्ट्रातील सुरू असलेल्या विकास कामांविषयी माहिती घेतली.
आमदार ज्ञानेश्वर कटके यांनी या प्रसंगी सांगितले की, “देशाचे पंतप्रधान आदरणीय नरेंद्र मोदी हे आज जागतिक स्तरावर भारताचा सन्मान वाढवणारे नेतृत्व आहे. देशाच्या प्रगतीचा मार्ग ठरविणाऱ्या या महामानवांचे स्वागत करण्याची संधी मिळणे ही माझ्यासाठी अत्यंत अभिमानाची बाब आहे. त्यांच्या प्रेरणेने शिरूर-हवेली विधानसभा मतदारसंघातही विकासाचा वेग अधिक वाढविण्याचा माझा प्रयत्न राहील.”
तसेच त्यांनी पुढे नमूद केले की, “पंतप्रधान मोदी यांच्या नेतृत्वाखाली देशात शेती, उद्योग, रोजगार, पायाभूत सुविधा, शिक्षण आणि आरोग्य या क्षेत्रांमध्ये क्रांतिकारी बदल घडत आहेत. केंद्र व राज्य सरकार एकत्र येऊन महाराष्ट्राच्या सर्वांगीण विकासासाठी झटत आहेत. शिरूर-हवेली मतदारसंघासाठीही अनेक योजना प्रगतीपथावर असून, त्यातून ग्रामीण भागाचा विकास आणि तरुणांना रोजगार मिळण्याचा मार्ग मोकळा होणार आहे.”
या प्रसंगानंतर आमदार ज्ञानेश्वर कटके यांनी पंतप्रधानांच्या स्वागतासाठी उपस्थित सर्व अधिकारी आणि पक्ष कार्यकर्त्यांचे आभार मानले. त्यांनी सांगितले की, “अशा प्रसंगी शिरूर-हवेली मतदारसंघाचे प्रतिनिधित्व करणे ही माझ्यासाठी केवळ जबाबदारी नसून जनतेच्या विश्वासाचा सन्मान आहे. हा क्षण माझ्या राजकीय प्रवासातील अविस्मरणीय आणि गौरवशाली ठरणार आहे.”
यावेळी विमानतळ परिसरात उपस्थित अधिकाऱ्यांनी आणि कार्यकर्त्यांनी पंतप्रधानांच्या जयघोषात स्वागत केले. महाराष्ट्र राज्याच्या विकासाचा नवा अध्याय सुरू होत असल्याचा आत्मविश्वास प्रत्येकाच्या चेहऱ्यावर झळकत होता.
