Gauri Garje Death Case: गौरी गर्जे मृत्यू प्रकरण उघडकीस आल्यानंतर अवघ्या काही तासांत वरळी पोलिसांनी मुख्य संशयित अनंत गर्जे याला ताब्यात घेतले होते. त्या अटकेनंतर त्याला प्रथम पोलीस कोठडीत आणि त्यानंतर न्यायालयीन कोठडीत ठेवण्यात आले आहे. या प्रकरणात अद्यापही त्याला जामीन मंजूर झालेला नाही.
दरम्यान, या प्रकरणाचा तपास अधिक व्यापक करण्यासाठी मुख्यमंत्र्यांच्या निर्देशानुसार स्थापन करण्यात आलेल्या विशेष तपास पथकाने (SIT) अनंत गर्जेला पुन्हा अटक केली आहे. त्यामुळे या प्रकरणाच्या तपासाला नवे वळण मिळाले असून, एसआयटीच्या चौकशीतून आणखी कोणती धक्कादायक माहिती समोर येते, याकडे सर्वांचे लक्ष लागले आहे.
एसआयटीकडून होणाऱ्या तपासात अनंत गर्जेच्या भूमिकेसह त्याच्या संपर्कातील व्यक्ती, आर्थिक व्यवहार आणि घटनेपूर्वी व नंतरच्या हालचालींची सखोल चौकशी केली जाणार असल्याचे सूत्रांकडून सांगण्यात येत आहे. मोबाईल कॉल डिटेल्स, सीसीटीव्ही फुटेज आणि डिजिटल पुरावे पुन्हा तपासले जाणार असून, या प्रकरणात आणखी आरोपी किंवा कटाचा धागा उघडकीस येण्याची शक्यता व्यक्त केली जात आहे.
