ZP School Jobs : महाराष्ट्रातील जिल्हा परिषद (ZP) शाळांमध्ये शिक्षकांच्या रिक्त पदांवर लवकरच मेगा भरती होणार आहे. राज्यात सुमारे १५ हजार १५८ शिक्षकांची पदे रिक्त असून, त्यापैकी ८० टक्के म्हणजे अंदाजे ८ हजार पदे भरण्याचे नियोजन शालेय शिक्षण विभागाने केले आहे. ही भरती प्रक्रिया स्थानिक स्वराज्य संस्थांच्या निवडणुकांची आचारसंहिता संपल्यानंतर सुरू होईल.
कधी सुरू होईल भरती प्रक्रिया?
महापालिका व जिल्हा परिषद निवडणुकांची आचारसंहिता संपल्यावर फेब्रुवारी-मार्च २०२५ पासून भरतीला सुरुवात अपेक्षित आहे. सध्या २०२५-२६ शैक्षणिक वर्षाची संचमान्यता (पदमान्यता) अंतिम टप्प्यात असून, त्यानंतर पटसंख्येनुसार अतिरिक्त व रिक्त पदे निश्चित केली जातील. हिवाळी अधिवेशनातही यासंबंधी चर्चा झाली होती.
अशी होईल भरती?
– ही भरती पूर्णपणे ‘पवित्र पोर्टल’ (Pavitra Portal) द्वारे पारदर्शक पद्धतीने राबवली जाईल.
– टीईटी (शिक्षक पात्रता परीक्षा) उत्तीर्ण उमेदवारांची गुणवत्ता यादी तयार होईल.
– जिल्हानिहाय रिक्त पदांची माहिती जाहीर केल्यानंतर जाहिराती प्रसिद्ध होतील.
– उमेदवारांना पोर्टलवर नोंदणी करून प्राधान्यक्रम निवडावा लागेल.
जिल्हा परिषद शाळांची सद्यस्थिती
राज्यात एकूण ६३,००० हून अधिक जिल्हा परिषद शाळा आहेत. यात सुमारे १.९८ लाख शिक्षक कार्यरत आहेत, मात्र १५,१५८ पदे रिक्त आहेत. या रिक्त पदांपैकी ८० टक्के पदे भरण्याचा निर्णय घेण्यात आला आहे. यामुळे ग्रामीण भागातील शाळांमध्ये शिक्षकांची टंचाई दूर होण्यास मदत होईल.
शिक्षक होण्याचे स्वप्न पाहणाऱ्या उमेदवारांनी आता तयारीला लागावे. अधिकृत अधिसूचना व जाहिरातींसाठी ‘पवित्र पोर्टल’ (mahateacherrecruitment.org.in) आणि शालेय शिक्षण विभागाच्या संकेतस्थळावर लक्ष ठेवावे. ही भरती प्रक्रिया पारदर्शक व गुणवत्ताधारित असल्याने पात्र उमेदवारांना चांगली संधी मिळेल.
