Pune News: पिंपरी-चिंचवड महानगरपालिका निवडणुकीच्या रणधुमाळीत मुख्यमंत्री देवेंद्र फडणवीस यांनी आज जाहीर सभेतून विरोधकांवर जोरदार निशाणा साधला. नाव न घेता उपमुख्यमंत्री अजित पवार यांच्यावर टीका करतानाच, त्यांनी भाजप आमदार महेश लांडगे यांना संयम राखण्याचा सल्ला दिला. आपले काम बोलत असल्यानेच विरोधकांच्या पोटात गोळा आला आहे, अशा शब्दांत त्यांनी निशाणा साधला. निवडणुका आल्या की अनेकांना कंठ फुटतो, असं म्हणत त्यांनी अजित पवार यांच्यावर नाव न घेता टीका केली.
महेश लांडगेंना ‘दादा’ स्टाईल सल्ला
सभेत बोलताना फडणवीस म्हणाले, “निवडणुका आल्या की अनेकांचा कंठ फुटतो. महेश दादा, विरोधकांच्या टीकेने तुम्ही वैतागू नका. आपण केलेल्या विकासकामांचा हा राग आहे. त्यांच्याकडे प्रश्नांची उत्तरे नाहीत, म्हणून ते निवडणुकीला वादाच्या वळणावर नेण्याचा प्रयत्न करत आहेत. तुम्ही फक्त कामावर लक्ष द्या.”
2014 नंतर शहराचा चेहरा बदलला
कष्टकरी आणि भूमीपुत्रांचे शहर म्हणून ओळखल्या जाणाऱ्या पिंपरी-चिंचवडला भाजपने आधुनिक स्वरूप दिल्याचे फडणवीस यांनी आवर्जून सांगितले. 2014 नंतर राबवलेल्या विकास प्रकल्पांमुळे शहराचे रूप पालटले असून, हेच प्रगतीचे चक्र पुढे नेण्याचे आवाहन त्यांनी केले.
घरकुल योजना आणि भ्रष्टाचारावरून टोला
भाजप सरकारच्या काळातील ‘प्रधानमंत्री आवास योजना’ आणि आधीच्या सरकारच्या योजनांच्या वेगाची तुलना करत त्यांनी विरोधकांना उत्तर दिले. आमच्या काळात घरे कशी होती आणि आताची प्रगती काय आहे, हे जनतेला माहित आहे. मागच्या वेळीपेक्षा अधिक जागांवर भाजप विजयी होईल, असा विश्वास त्यांनी व्यक्त केला.
भविष्यकाळातील आव्हाने
पुणे जिल्ह्याच्या वाढत्या विस्तारामध्ये पिंपरी-चिंचवडची लोकसंख्या पुण्यापेक्षाही अधिक होईल, असा अंदाज त्यांनी वर्तवला. त्यामुळे वाढत्या लोकसंख्येला साजेसे उत्तम शिक्षण, रोजगार आणि पायाभूत सुविधा पुरवण्यावर भाजपचा भर असल्याचे त्यांनी स्पष्ट केले. शाळांचा दर्जा सुधारण्याला आपले प्राधान्य असल्याचेही ते म्हणाले.
