Pune Crime News : पुण्यातील कोथरूड परिसरात प्रेमप्रकरणातून एका २३ वर्षीय तरुणाची निर्घृण हत्या झाल्याची खळबळजनक घटना घडली आहे. मृत तरुणाचे नाव नागेश संजय जाधव (वय २३, रा. शिवाजीनगर) असे आहे. या प्रकरणात मुलीच्या कुटुंबीयांसह १० हून अधिक जणांवर कोथरूड पोलिसांनी गुन्हा दाखल केला आहे.
शुक्रवार, १४ मार्च २०२६ रोजी सायंकाळी ७:१५ च्या सुमारास नागेशला फोन आला आणि तो घराबाहेर पडला. रात्री ८:०३ वाजता आरोपींनी नागेशच्या आईला त्याच मोबाईलवरून कॉल केला. फोनवर शिवीगाळ करत आरोपी म्हणाले, “तुझा मुलगा आमच्या ताब्यात आहे, आम्ही त्याला मारले आहे. १० मिनिटांत येऊन घेऊन जा, नाहीतर खाली टाकून देऊ.” ही धमकी व्हिडिओ कॉलद्वारे देण्यात आली होती.
नागेशची आई आणि नातेवाईक तात्काळ कोथरूडमधील मेगासिटी येथे पोहोचले. तेथे नागेश छतावर विवस्त्र अवस्थेत रक्ताच्या थारोळ्यात पडला होता. काही महिला आणि पुरुष त्याला लाकडी दांडके, लाथा-बुक्क्यांनी बेदम मारहाण करत होते. नातेवाईकांनी त्याला प्रथम रत्ना हॉस्पिटल आणि नंतर ससून हॉस्पिटलमध्ये नेले, मात्र उपचारादरम्यान डॉक्टरांनी त्याला मृत घोषित केले.
मृत्यूपूर्वी नागेशने आईला सांगितले की, मुलीने मेसेज करून बोलावले होते. तेथे गेल्यावर तिच्या कुटुंबीयांनी त्याला पकडून मारहाण केली. प्रकरणात मुलीशी मैत्री असल्याच्या रागातून ही हत्या झाल्याचा प्राथमिक निष्कर्ष आहे.
नागेशच्या आईने दिलेल्या फिर्यादीवरून कोथरूड पोलिसांनी मुलीची आई, वडील, चुलते आणि इतर नातेवाईकांसह १० हून अधिक जणांवर गुन्हा दाखल केला आहे. हे सर्व जण संगनमताने हत्या केल्याचे पोलिसांचे मत आहे. पोलिसांनी तपास सुरू केला असून, आरोपींच्या मुसक्या आवळण्यासाठी पथके तैनात आहेत.
या घटनेमुळे कोथरूड आणि शिवाजीनगर परिसरात तणावाचे वातावरण आहे. नातेवाईकांकडून आरोपींना कठोर शिक्षा देण्याची मागणी करण्यात आली आहे. प्रेमप्रकरणातून होणाऱ्या अशा हिंसक घटना रोखण्यासाठी समाजात जागृतीची गरज व्यक्त होत आहे. कोथरूड पोलिस या प्रकरणाचा सखोल तपास करत आहेत.
