Fake Currency Racket: महाराष्ट्रात नाशिकच्या अशोक खरात प्रकरणाने खळबळ उडालेली असतानाच आता शेजारील गुजरात राज्यातून एका भोंदू बाबाचे धक्कादायक कारस्थान उघडकीस आले आहे. अध्यात्माच्या नावाखाली चालणाऱ्या एका आश्रमात चक्क बनावट नोटा छापण्याचा कारखानाच सुरू असल्याचे समोर आले असून, अहमदाबाद गुन्हे शाखेने या मोठ्या रॅकेटचा पर्दाफाश केला आहे. सुरतजवळील कामरेज तालुक्यातील पारडी गावात असलेल्या ‘श्री सत्य योग फाउंडेशन’ या आश्रमावर पोलिसांनी छापा टाकला असता, तिथे धर्माच्या नावाखाली देशविरोधी गोरखधंदा सुरू असल्याचे निष्पन्न झाले.
या कारवाईदरम्यान पोलिसांनी तब्बल २ कोटी रुपयांहून अधिक किमतीच्या बनावट नोटा जप्त केल्या आहेत. गुन्हे शाखेला मिळालेल्या गोपनीय माहितीनुसार, बनावट नोटांची एक मोठी खेप सुरतहून अहमदाबादला नेली जाणार होती. या माहितीच्या आधारे अमराईवाडी परिसरात नाकाबंदी करून पोलिसांनी संशयास्पद हालचाली करणाऱ्या ६ पुरुष आणि काही महिलांना ताब्यात घेतले. त्यांच्या झडतीत ५०० रुपयांच्या ४० हजारांहून अधिक बनावट नोटा सापडल्या, ज्यांची बाजारमूल्य कोट्यवधींच्या घरात आहे. या नोटा मोजताना खुद्द पोलीसही चक्रावून गेले होते.
तपासात या टोळीची कार्यपद्धती पाहून पोलीसही थक्क झाले. हे भामटे ‘५०० च्या खऱ्या नोटा द्या आणि त्या बदल्यात तीनपट बनावट नोटा मिळवा’ अशी योजना चालवत होते. ६६ लाख रुपयांच्या खऱ्या चलनाऐवजी २ कोटी रुपयांचे बनावट चलन चलनात आणण्याचा त्यांचा डाव होता. आश्रमात टाकलेल्या छाप्यात नोटा छापण्याचे प्रिंटिंग मशीन, संगणक, विशेष कागद, शाई आणि इतर आक्षेपार्ह साहित्य जप्त करण्यात आले आहे. आश्रमाच्या गाड्यांचा वापर या नोटांच्या तस्करीसाठी केला जात होता. या प्रकरणाचे धागेदोरे देशभरात पसरले असण्याची शक्यता असल्याने पोलिसांनी तपासाची चक्रे वेगाने फिरवली आहेत.
