Dr. Gopalrao Patil Death: राजकारणातील साधेपणाचा चेहरा, प्रख्यात बालरोगतज्ञ आणि ज्येष्ठ शिक्षणतज्ज्ञ डॉ. गोपाळराव पाटील यांचे आज, २१ एप्रिल रोजी सकाळी लातूर येथे दुःखद निधन झाले. वयाच्या ९४ व्या वर्षी त्यांनी एका खासगी रुग्णालयात अखेरचा श्वास घेतला. त्यांच्या निधनाने लातूरसह संपूर्ण राज्याच्या सार्वजनिक जीवनातील एक ऋषितुल्य व्यक्तिमत्व काळाच्या पडद्याआड गेले आहे.
राजकारण ते समाजकारण: एक समृद्ध प्रवास
डॉ. गोपाळराव पाटील यांनी १९९४ ते २००० या कालावधीत भारतीय जनता पक्षाचे प्रतिनिधित्व करत राज्यसभा सदस्य म्हणून संसद गाजवली. आपल्या कार्यकाळात त्यांनी रेल्वे, परराष्ट्र व्यवहार आणि वाणिज्य यांसारख्या महत्त्वाच्या संसदीय समित्यांवर मोलाचे योगदान दिले. केवळ राजकारणच नव्हे, तर लातूरच्या शैक्षणिक क्रांतीतही त्यांचा सिंहाचा वाटा होता. त्यांनी स्थापन केलेल्या ‘शिवछत्रपती शिक्षण संस्थे’च्या माध्यमातून ‘राजर्षी शाहू महाविद्यालया’ने शैक्षणिक क्षेत्रात एक वेगळा ‘लातूर पॅटर्न’ निर्माण केला.
ग्रामीण भागातील ‘देवमाणूस’
३ ऑक्टोबर १९३१ रोजी धाराशिव जिल्ह्यातील कवठा येथे जन्मलेल्या डॉ. पाटील यांनी हैदराबादच्या उस्मानिया विद्यापीठातून वैद्यकीय पदवी घेतली. बालरोगतज्ञ म्हणून त्यांनी लातूरमध्ये आपली प्रॅक्टिस सुरू केली. ग्रामीण भागातील गोरगरीब रुग्णांची त्यांनी आयुष्यभर मोफत सेवा केली, ज्यामुळे त्यांना ‘देवमाणूस’ म्हणून ओळखले जात असे. ‘इंडियन पेडियाट्रिक असोसिएशन’च्या स्थापनेतही त्यांचा मोठा पुढाकार होता.
मान्यवरांकडून आदरांजली
डॉ. पाटील यांच्या निधनानंतर राजकीय वर्तुळातून शोक व्यक्त केला जात आहे. मुख्यमंत्री देवेंद्र फडणवीस यांनी ‘एक्स’ (पूर्वीचे ट्विटर) वर पोस्ट करत, “एक दूरदर्शी नेतृत्व आणि समर्पित समाजसेवक गमावला,” अशा शब्दांत श्रद्धांजली अर्पण केली. तसेच आमदार अमित देशमुख यांनीही डॉ. पाटील यांच्या शैक्षणिक आणि सामाजिक कार्याचा गौरव करत त्यांना वंदन केले आहे. त्यांच्या पार्थिवावर आज लातूर येथे अंत्यसंस्कार केले जाणार असून, त्यांच्या पश्चात मोठा परिवार आणि दांडगा मित्रपरिवार आहे.
