Baramati Bypoll Election Result: बारामती विधानसभा पोटनिवडणुकीत सुनेत्रा पवार यांनी केवळ विजयच मिळवला नाही, तर भारतीय राजकारणातील एक नवा इतिहास रचला आहे. तब्बल २ लाख १८ हजार ९३० मतांचे प्रचंड मताधिक्य घेत त्यांनी विरोधकांचा अक्षरशः सुपडा साफ केला आहे. हे मताधिक्य देशातील विधानसभा निवडणुकांच्या इतिहासातील पहिल्या क्रमांकाचे ‘लीड’ मानले जात आहे.
अजित पवारांचा ‘तो’ ऐतिहासिक विक्रम आता इतिहासजमा
आजवर बारामतीत आणि महाराष्ट्रात सर्वात मोठ्या विजयाचा विक्रम उपमुख्यमंत्री अजित पवार यांच्या नावावर होता. २०१९ मध्ये त्यांनी गोपीचंद पडळकर यांचा १ लाख ६५ हजार २६५ मतांनी पराभव केला होता. मात्र, सुनेत्रा पवारांनी १९ व्या फेरीअखेरच हा विक्रम मोडीत काढला आणि २.१८ लाखांच्या फरकाने विजयाची नवी मोहोर उमटवली.
अजित पवारांचे यापूर्वीचे मोठे विजय:
- २०१९: १,६५,२६५ मताधिक्य (विक्रमी)
- २०२४: १,००,८९९ मताधिक्य (युगेंद्र पवारांविरुद्ध)
- २००९: १,०२,७९७ मताधिक्य
अटीतटीची लढत की एकतर्फी विजय?
सुरुवातीला ही निवडणूक बिनविरोध करण्यासाठी महायुतीने प्रयत्न केले होते. विशेष म्हणजे, शरद पवार गटाने येथे उमेदवार न देता सुनेत्रा पवारांना पाठिंबा जाहीर केला होता. काँग्रेसने उमेदवार उभा केला होता, मात्र ऐनवेळी त्यांनी माघार घेतल्याने लढत एकतर्फी झाली. आमदार रोहित पवार यांनी स्वतः प्रचाराची धुरा सांभाळली होती, ज्याचा फायदा सुनेत्रा पवारांना विक्रमी मते मिळवण्यात झाला.
बारामतीकरांचे ‘वहिनीं’वर भरभरून प्रेम
अजित पवार सलग आठ वेळा बारामतीतून निवडून आले आहेत, पण सुनेत्रा पवारांना मिळालेले हे मताधिक्य बारामतीकरांनी त्यांच्यावर केलेल्या विश्वासाचे प्रतीक मानले जात आहे. या विजयाने बारामती हा पवारांचा अभेद्य गड असल्याचे पुन्हा एकदा सिद्ध झाले असून, सुनेत्रा पवारांनी पहिल्याच प्रयत्नात ‘जायंट किलर’ ठरत स्वतःचे स्वतंत्र स्थान निर्माण केले आहे.
