Jalna Fuel Shortage: राज्यात काही भागांत पेट्रोल आणि डिझेलचा पुरवठा विस्कळीत झाल्याने नागरिकांची पेट्रोल पंपांवर मोठी गर्दी होत आहे. या परिस्थितीचा विचार करून जालना जिल्हा प्रशासनाने महत्त्वाची पावले उचलली आहेत. जिल्हाधिकारी अशीमा मित्रा यांनी जिल्ह्यातील सर्व पेट्रोल पंपांना त्यांच्या उपलब्ध इंधनसाठ्यातील 5 टक्के हिस्सा अत्यावश्यक सेवा आणि शासकीय वाहनांसाठी राखून ठेवण्याचे निर्देश दिले आहेत. यासोबतच सुरक्षेच्या दृष्टीने कॅन, प्लास्टिक डबे किंवा बाटल्यांमध्ये पेट्रोल आणि डिझेल देण्यास मनाई करण्यात आली आहे. वाढती गर्दी आणि संभाव्य गैरवापर टाळण्यासाठी प्रशासनाने हा निर्णय घेतल्याचे सांगितले जात आहे.
पेट्रोल पंपांवर नागरिकांची मोठी रांग
दरम्यान, जालना जिल्ह्यात अनेक पेट्रोल पंपांवर नागरिकांची मोठी रांग दिसून येत असून विशेषतः डिझेलसाठी वाहनचालक आणि शेतकऱ्यांची धावपळ सुरू आहे. हिंगोली जिल्ह्यातही डिझेलची कमतरता सलग चौथ्या दिवशी कायम असल्याचे चित्र आहे. अनेक पंपांवर डिझेल संपल्याने वाहनांच्या लांबलचक रांगा लागल्या आहेत. शेतकरी आणि मालवाहतूक चालकांना मोठ्या अडचणींचा सामना करावा लागत आहे. मध्यरात्रीपर्यंत अनेक ठिकाणी डिझेलसाठी प्रतीक्षा सुरू असल्याचे दिसून आले.
बीड जिल्ह्यातही पेट्रोल पंपांवर वाहनधारकांची गर्दी
बीड जिल्ह्यातही पेट्रोल पंपांवर वाहनधारकांची गर्दी वाढली आहे. खरीप हंगामाची कामे सुरू असल्याने ट्रॅक्टरसाठी मोठ्या प्रमाणात डिझेलची मागणी वाढली आहे. काही ठिकाणी नागरिक कॅनमधून डिझेल नेत असल्याचे चित्र दिसत असले, तरी इंधनाचा तुटवडा नसल्याचा दावा पेट्रोल पंप चालकांकडून केला जात आहे. मात्र, प्रत्यक्षात पुरवठा आणि उपलब्धतेबाबत नागरिकांमध्ये नाराजी व्यक्त केली जात आहे.
