Pune Mumbai Expressway Accident: पुणे–मुंबई एक्सप्रेसवेवर मावळ तालुक्यातील बऊर गावाजवळ बुधवारी सकाळी एक गंभीर अपघात घडला. मुंबईहून पुण्याकडे येणारी स्कोडा कार भरधाव वेगात असताना चालकाचे वाहनावरील नियंत्रण अचानक सुटले आणि कार थेट महामार्गावरील लोखंडी सुरक्षा कठड्यावर आदळली.
तिघांपैकी दोघांचा जागीच मृत्यू
अपघाताचा जोर इतका प्रचंड होता की कारचा पुढील भाग पूर्णपणे उद्ध्वस्त झाला. वाहनातील तिघांपैकी दोघांचा जागीच मृत्यू झाला, तर एक जण गंभीर जखमी झाला आहे. धडकेनंतर कारमधील प्रवासी आतमध्ये अडकून पडले होते. बचाव पथकाने मोठ्या प्रयत्नांनंतर वाहनाचा पत्रा कापून सर्वांना बाहेर काढले. जखमी व्यक्तीला तातडीने रुग्णालयात दाखल करण्यात आले असून मृतदेह शवविच्छेदनासाठी शासकीय रुग्णालयात पाठवण्यात आले आहेत.
चालकाचे नियंत्रण सुटल्याने घडला अपघात
घटनेची माहिती मिळताच महामार्ग पोलीस आणि आयआरबीची टीम घटनास्थळी दाखल झाली. अपघातग्रस्त वाहन हटवून वाहतूक पूर्ववत करण्याचे काम सुरू करण्यात आले. प्राथमिक तपासानुसार, अतिवेगामुळे चालकाचे नियंत्रण सुटल्याने हा अपघात झाल्याची शक्यता व्यक्त केली जात आहे.
