Mega Block : पुणे आणि परिसरातील रेल्वे प्रवाशांसाठी महत्त्वाची बातमी आहे. पुणे-दौंड रेल्वे विभागात विविध तांत्रिक आणि देखभाल कामांसाठी 14 जून रोजी पुणे रेल्वे स्थानकावर तब्बल 9 तासांचा मेगा ब्लॉक घेण्यात येणार आहे. या ब्लॉकमुळे रेल्वे वाहतुकीवर परिणाम होणार असून काही लोकल आणि डेमू गाड्या रद्द करण्यात आल्या आहेत.
रेल्वे प्रशासनाच्या माहितीनुसार, रविवारी सकाळी 8 वाजल्यापासून सायंकाळी 5 वाजेपर्यंत हा मेगा ब्लॉक लागू राहणार आहे. या कालावधीत पुणे स्थानकावरील फलाट क्रमांक 3 आणि 4 हे छत्रपती शिवाजी महाराज टर्मिनसकडून येणाऱ्या आणि जाणाऱ्या गाड्यांसाठी बंद ठेवण्यात येणार आहेत.
रेल्वेच्या पायाभूत सुविधांचे आधुनिकीकरण, सिग्नल यंत्रणा सुधारणा, इलेक्ट्रिक व्यवस्था आणि ओव्हरहेड इक्विपमेंट (OHE) संबंधित कामांसाठी हा ब्लॉक घेण्यात येत आहे. सुरक्षित आणि अधिक सक्षम रेल्वे सेवा देण्यासाठी ही कामे आवश्यक असल्याचे प्रशासनाने स्पष्ट केले आहे.
रद्द करण्यात आलेल्या गाड्या
पुणे – तळेगाव लोकल (99902)
तळेगाव – पुणे लोकल (99903)
बारामती – पुणे डेमू
पुणे – दौंड डेमू
याशिवाय काही एक्स्प्रेस आणि प्रवासी गाड्यांच्या वेळापत्रकात तसेच मार्गांमध्ये बदल करण्यात आले आहेत. त्यामुळे नियमित प्रवासी, विद्यार्थी, नोकरदार आणि ग्रामीण भागातून पुण्यात येणाऱ्या नागरिकांनी प्रवासाचे नियोजन करण्यापूर्वी रेल्वेचे अद्ययावत वेळापत्रक तपासावे, असे आवाहन रेल्वे प्रशासनाने केले आहे.
मेगा ब्लॉकमुळे काही काळ गैरसोय होण्याची शक्यता असली तरी भविष्यातील सुरक्षित आणि सुरळीत रेल्वे वाहतुकीसाठी ही कामे महत्त्वाची मानली जात आहेत.
