Pawanraje Nimbalkar Case: महाराष्ट्राच्या राजकारणाला हादरवून सोडणाऱ्या पवनराजे निंबाळकर दुहेरी खून खटल्याचा अखेर आज निकाल लागण्याची दाट शक्यता आहे. तब्बल दोन दशकांपासून प्रलंबित असलेल्या या प्रकरणाची अंतिम सुनावणी मुंबई सत्र न्यायालयात होणार आहे. या महत्त्वपूर्ण क्षणी न्याय मिळावा यासाठी दिवंगत पवनराजे यांचे सुपुत्र खासदार ओमराजे निंबाळकर हे आपल्या कुटुंबीयांसह न्यायालयात उपस्थित राहणार आहेत. त्यांच्यासोबतच, या हल्ल्यात बळी गेलेले त्यांचे वाहनचालक समद काझी यांचे कुटुंबीयही मुंबईत दाखल झाले आहेत. वीस वर्षांनंतर कोर्ट काय निकाल देणार, याकडे आता संपूर्ण महाराष्ट्राचे डोळे लागले आहेत.
संवेदनशील पार्श्वभूमी; धाराशिवमध्ये हायअलर्ट आणि कडक पोलीस बंदोबस्त
या हाय-प्रोफाइल निकालाच्या पार्श्वभूमीवर, धाराशिव (उस्मानाबाद) जिल्ह्यामध्ये कायदा व सुव्यवस्था राखण्यासाठी पोलीस यंत्रणा प्रचंड सतर्क झाली आहे. पोलीस अधीक्षक रितू खोकर यांनी सुरक्षेचा आढावा घेत संपूर्ण जिल्ह्यात कडक बंदोबस्त तैनात करण्याचे आदेश दिले आहेत. राजकीय दृष्ट्या हे प्रकरण अत्यंत संवेदनशील असल्याने दोन्ही गटांच्या समर्थकांवर आणि त्यांच्या हालचालींवर विशेष नजर ठेवली जात आहे. तसेच, समाजात कोणतीही तेढ निर्माण होऊ नये म्हणून सोशल मीडियावरील पोस्टवरही सायबर पोलिसांचे बारीक लक्ष असणार आहे.
नेमकं काय घडलं होतं? ३ जून २००६ चा तो रक्तरंजित थरार
“राजकीय वैमनस्यातून २५ लाखांची सुपारी देऊन ही दुहेरी हत्या घडवण्यात आली,” असा थेट आरोप सीबीआयने (CBI) तपासात केला आहे. ३ जून २००६ रोजी पवनराजे निंबाळकर हे मुंबईहून उस्मानाबादकडे जात असताना, नवी मुंबईतील कळंबोली परिसरात दोन अज्ञात बंदूकधाऱ्यांनी त्यांच्या गाडीचा पाठलाग केला. हल्लेखोरांनी केलेल्या बेधुंद गोळीबारात पवनराजे निंबाळकर आणि त्यांचे चालक समद काझी या दोघांचा जागीच मृत्यू झाला होता. या घटनेने संपूर्ण राज्याच्या राजकीय वर्तुळात खळबळ उडवून दिली होती.
बडे नेते आणि शूटर अडकले जाळ्यात; ९ जणांवर खटला
या नियोजनबद्ध हत्येचे मुख्य सूत्रधार म्हणून माजी गृहमंत्री आणि माजी खासदार डॉक्टर पद्मसिंह पाटील यांच्यावर आरोप ठेवण्यात आले आहेत. ते सध्या (सप्टेंबर २००९ पासून) जामिनावर बाहेर आहेत. या खटल्यात एकूण ९ आरोपींचा समावेश असून, त्यात उत्तर प्रदेशचा बसप नेता कैलास यादव, माजी नगरसेवक मोहन शुक्ला, तसेच सतीश मंदाडे, पारसमल जैन, शशीकांत कुलकर्णी आणि प्रत्यक्ष गोळ्या झाडणारे शूटर दिनेश तिवारी, पिंटू सिंग व छोटू पांडे यांचा समावेश आहे.
यापूर्वी १४ मे रोजी या प्रकरणाचा निकाल अपेक्षित होता. मात्र, आरोपी पद्मसिंह पाटील आणि मोहन शुक्ला यांनी वैद्यकीय कारणांचे कारण पुढे करत हजेरीतून सवलत मागितल्यामुळे ही सुनावणी पुढे ढकलण्यात आली होती. आज होणाऱ्या या सुनावणीनंतर न्यायालय काय निकाल सुनावणार, याकडे सर्वांचे लक्ष वेधले गेले आहे.
