पुणे : हातबॉम्बची विक्री करण्याच्या तयारीत असलेल्या तरुणाला न्यायालयाने शुक्रवारी (दि. १८) दोन महिन्यांच्या कारावासाची शिक्षा सुनावली. कैदेबरोबरच त्याला दोन हजार रुपये दंड ठोठावण्यात आला. विकी अशोक सावंत (वय २४, रा. शिवकृपा कॉलनी, नढेनगर, काळेवाडी) हे आरोपीचे नाव आहे. वाकड पोलिसांच्या पथकाने ९ सप्टेंबर २०१५ ला सावंत याला थोपटे लॉन परिसरात संशयावरून ताब्यात घेतले. झडतीमध्ये त्याच्याकडे हातबाँम्ब असल्याचे आढळले. त्यानंतर बॉम्ब शोधक नाशक पथकाला (बीडीडीएस) घटनास्थळी पाचारण करण्यात आली. बीडीडीएसच्या पथकाने सावंतकडून बॉम्ब ताब्यात घेतला. त्याच्याकडील हातबॉम्ब गावठी बनावटीचा असल्याचे तपासणीत आढळले. याबाबतचा अहवाल पोलिसांकडे देण्यात आला.
सावंत याच्याविरुद्ध बेकायदा हातबॉम्ब बाळगल्याप्रकरणी गुन्हा दाखल करुन त्याला अटक करण्यात आली होती. त्याच्याविरुद्ध न्यायालयात आरोपपत्र दाखल करण्यात आले. या खटल्यात सरकार पक्षाकडून अतिरिक्त सरकारी वकील वामन कोळी यांनी बाजू मांडली. सरकार पक्षाकडून या खटल्यात नऊ साक्षीदारांची साक्ष नोंदविण्यात आली होती. तपास अधिकारी, तसेच बॉम्बशोधक नाशक पथकातील अधिकाऱ्यांची साक्ष महत्त्वाची ठरली, साक्षी व पुरावे ग्राह्य धरुन अतिरिक्त जिल्हा सत्र न्यायाधीश जे. जी. डोरले यांनी सावंत याला शिक्षा सुनावली.
