बार्शी : शिक्षण घेत असलेल्या अल्पवयीन मुलीच्या आईला धमकी देत, तुझ्या मुलीसोबत लग्न करायचे आहे, नाही केल्यास तिला पळवून नेईन, असे म्हणत लग्न लावल्यानंतर संबंधित मुलीचा पती व सासरच्या मंडळींनी हुंडा, मानपान आणि घरकामाच्या कारणावरून तिचा शारीरिक व मानसिक छळ केल्याचा आरोप पीडित अल्पवयीन विवाहितेने केला आहे. या प्रकरणी संबंधितांविरोधात तालुका पोलीस ठाण्यात गुन्हा दाखल करण्यात आला आहे.
पीडितेने दिलेल्या फिर्यादीत म्हटले आहे की, पीडितेचे सध्याचे वय १७ वर्ष ५ महिने असून पीडिता दोन वर्षापूर्वी शिक्षण घेत असताना ती अल्पवयीन आहे हे माहीत असूनही पवन राजकुमार गायकवाड याने पीडितेच्या आईस तुझ्या मुलीसोबत लग्न करायचे आहे, नाही केल्यास तिला पळवून नेईन, अशी धमकी दिली. त्यानंतर घाबरलेल्या आईने नातेवाईकांना सोबत घेऊन लग्न जमविण्यासाठी बोलले असता संबंधित मुलाच्या आई व वडिलांनी आम्हाला फक्त नारळ द्या, बाकी काही नको, लग्न आम्ही करतो, अशी मागणी केली.
त्यानंतर दोन वर्षापूर्वी दि. २९ मे २०२३ रोजी मोजक्या पाहुण्यात लग्न झाले. दरम्यान, एक महिन्यानंतर सासू-सासरे तसेच पतीने लग्नात मानपान केला नाही, तुला फुकट घरात घेतलंय, तुला काम येत नाही, म्हणून मारहाण व छळ सुरू केला. तसेच सणावाराला आल्यानंतर नणंद कोमल ही घालून पाडून पीडितास बोलत असे. तुझ्या पोटातील मूल आम्हाला नको, असे म्हणून लाथांनी पोटावर, हाताने मारहाण करून पीडितेला माहेरी हाकलून दिले. पोटावर मारहाण केल्याने दुसऱ्या दिवशी पोटात दुखून घरीच गर्भपात झाला.
तेव्हापासून पीडिता माहेरी आईकडे राहण्यास असल्याचे फिर्यादी म्हटले आहे. यावरून पती पवन राजकुमार गायकवाड, सासू अलका राजकुमार गायकवाड व सासरा राजकुमार कुंडलिक गायकवाड (तिघे रा. आगळगाव, ता. बार्शी), नणंद कोमल राहुल पौळ (रा. निरवांगी, ता. इंदापूर, जि. पुणे) यांच्याविरुध्द तक्रार दिली आहे.
