पुणे : जिल्ह्यातील मावळ तालुक्यात गुन्हेगारीचा धोका वाढत असताना, राष्ट्रवादी काँग्रेसचे आमदार सुनील शेळके यांच्या हत्येचा भयानक कट उघडकीस आला आहे. यानंतर आता या प्रकरणाचा सखोल तपास करण्यासाठी विशेष तपास पथक (SIT) कार्यरत झाले आहे. अजित पवार गटातील प्रमुख नेते म्हणून ओळखल्या जाणाऱ्या सुनील शेळके यांच्या जीवावर बेतलेल्या या कटामागे कोण आहे, हे शोधण्यासाठी स्थापन झालेल्या या पथकाने तळेगाव दाभाडे परिसरातील गुन्हेगारीचा मूळ शोध घेण्यास सुरुवात केली आहे. या घटनेमुळे राजकीय वातावरण तापले असून, आमदार शेळके यांनीच ‘कटामागचा सूत्रधार कोण आणि हे पैसे कोण पुरवतंय?’ असा थेट सवाल उपस्थित केला आहे.
SIT ची स्थापना, तपासाला वेग
पिंपरी-चिंचवड पोलिस आयुक्तालयाने या प्रकरणासाठी विशेष तपास पथकाची (SIT) नियुक्ती केली असून, पिंपरी-चिंचवड झोन दोनचे उपायुक्त विशाल गायकवाड हे या समितीचे प्रमुख आहेत. ही समिती तळेगाव दाभाडे परिसरातील वाढत्या गुन्हेगारीचा सखोल अभ्यास करेल आणि हत्याकांड कटामागील प्रत्यक्ष-अप्रत्यक्ष सहभागींचा शोध घेईल. गायकवाड म्हणाले, “आयुक्तांनी मला या समितीला मार्गदर्शन करण्याची जबाबदारी सोपवली आहे. यापूर्वी दाखल गुन्ह्यांच्या अनुषंगाने अतिरिक्त तपास होईल आणि कटाच्या मुळाशी पोहोचण्यासाठी कोणतीही कसर बाकी ठेवणार नाही.”
SIT मध्ये सहायक पोलिस आयुक्त डॉ. विशाल हिरे, तळेगाव दाभाडे पोलिस निरीक्षक कन्हैया थोरात, गुंडाविरोधी पथकाचे सहायक पोलिस निरीक्षक हरीश माने, सहायक पोलिस निरीक्षक अंबरीश देशमुख, पोलिस उपनिरीक्षक रवींद्र खामगळ, तसेच पोलिस हवालदार अंकुश लांडे, सचिन बेंबाळे आणि सुनील सगर यांचा समावेश आहे. ही टीम हत्यारांसह ताब्यात घेतलेल्या आरोपींच्या जामीनानंतर पुन्हा गुन्हेगारीत सक्रिय झाल्याच्या तक्रारींचाही अभ्यास करेल.
जामिनावर सुटले आरोपी पुन्हा सक्रिय
हा कट मागील वर्षी २६ जुलै २०२३ रोजी पिंपरी-चिंचवड पोलिसांच्या गुंडाविरोधी पथकाने (ADC) तळेगाव दाभाडे येथे केलेल्या मोठ्या कारवाईत उघडकीस आला होता. या कारवाईत मध्यप्रदेश, जालना, वडगाव आणि काळेवाडी परिसरातील गुंडांना हत्यारांसह अटक करण्यात आली. तपासात धक्कादायक बाब समोर आली की, हे गुंड शेळके यांच्या हत्येचीच योजना रचत होते. या आरोपींवर आधीच खून, खुनाचा प्रयत्न, जाळपोळ, खंडणी, बेकायदेशीर हत्यारे बाळगणे, लूट आणि तोडफोडसारखे अनेक गंभीर गुन्हे दाखल आहेत. जामिनावर बाहेर सुटल्यानंतरही ते तळेगाव परिसरात दिसत असल्याच्या अनेक तक्रारी पोलिसांकडे दाखल झाल्या आहेत.
आमदार शेळके यांची पावसाळी अधिवेशनात मागणी
या घटनेच्या पार्श्वभूमीवर जुलै महिन्यात पावसाळी अधिवेशनात आमदार सुनील शेळके यांनी लक्षवेधी उपस्थित करून या कटाचा तपास आणि SIT ची स्थापना करण्याची मागणी केली होती. त्यावेळी गृहराज्यमंत्री योगेश कदम यांनी विधानसभेत सखोल चौकशीचे आश्वासन दिले. शेळके म्हणाले, “माझ्याकडे उपलब्ध असलेली सर्व माहिती मी SIT ला देईन. या कटाचा सखोल तपास व्हावा आणि मुळाशी असलेल्या व्यक्तीचा शोध घ्यावा. हे गुंड माझ्याशी वैयक्तिक वैर ठेवत नाहीत, मग हे सगळे कोणत्या हेतूने?’ तसेच, ‘हे पैसे कोण पुरवतंय आणि कटामागचा सूत्रधार कोण?’ असा प्रश्न त्यांनी उपस्थित केला आहे.
अजित पवार गटातील नेत्यावर हल्ल्याचा धोका?
राष्ट्रवादी काँग्रेसचे अजित पवार गटातील प्रमुख चेहरे असलेले सुनील शेळके हे मावळ मतदारसंघाचे आमदार आहेत. या कटामुळे पक्षांतर्गत आणि स्थानिक राजकारणात खळबळ उडाली आहे. तळेगाव दाभाडे परिसरातील गुन्हेगारी वाढल्याने स्थानिक नागरिकांमध्ये भीती पसरली असून, SIT च्या तपासाकडे सर्वांचे लक्ष लागले आहे. हा कट केवळ वैयक्तिक नसून, मोठ्या षडयंत्राचा भाग असल्याचे संकेत मिळत आहेत. तपास प्रक्रियेत नवीन पुरावे समोर आल्यास या प्रकरणाला वेगळे वळण मिळू शकते.
या घटनेमुळे पुणे जिल्ह्यातील गुन्हे नियंत्रणावर प्रश्नचिन्ह उपस्थित झाले असून, पोलिस प्रशासनाने आता कठोर पावले उचलली आहेत. आमदार शेळके यांच्या सुरक्षेसाठी विशेष व्यवस्था करण्यात आली असून, तपासाची अहवाल लवकरच समोर येईल.
