Harshvardhan Patil News : आगामी स्थानिक स्वराज्य संस्थांच्या निवडणुकीसाठी राजकीय पक्षांनी जोरदार तयारी सुरू केली आहे. पिंपरी-चिंचवड, हा एकेकाळी राष्ट्रवादी काँग्रेसचा बालेकिल्ला समजला जात होता. मात्र, २०१७ पासून भाजपने येथे आपले वर्चस्व प्रस्थापित केले आहे.
यामुळे शरद पवार यांच्या नेतृत्वाखालील राष्ट्रवादी काँग्रेस (शरदचंद्र पवार) आणि अजित पवार यांच्या राष्ट्रवादी काँग्रेस या दोन्ही गटांनी पिंपरी-चिंचवड महापालिका निवडणुकीवर विशेष लक्ष केंद्रित केले आहे.
या पार्श्वभूमीवर, उपमुख्यमंत्री अजित पवार यांनी नुकताच शहराचा दोन दिवसांचा दौरा करून पक्षाच्या तयारीचा आढावा घेतला, तर दुसरीकडे शरद पवार यांनी देखील पिंपरी-चिंचवडच्या निवडणूक रणनीतीचा सूक्ष्म आढावा घेत एक मोठा डाव टाकला आहे.
शरद पवार यांनी माजी आमदार हर्षवर्धन पाटील यांच्यावर पिंपरी-चिंचवडची जबाबदारी सोपवून राजकीय वर्तुळात खळबळ उडवली आहे. पाटील यांना शहराची सखोल माहिती असल्याने, त्यांच्यावर राष्ट्रवादी काँग्रेस (शरदचंद्र पवार) पक्षाचे जास्तीत जास्त नगरसेवक निवडून आणण्याचे महत्त्वाचे आव्हान आहे.
पाटील यांनी यापूर्वी इंदापूर विधानसभा मतदारसंघातून निवडणूक लढवली होती, परंतु महायुतीच्या लाटेत ते पराभूत झाले. निवडणूक निकालानंतर अनेक नेत्यांनी भाजप किंवा अजित पवारांच्या राष्ट्रवादीत प्रवेश करत पक्षांतराचा मार्ग स्वीकारला. मात्र, हर्षवर्धन पाटील यांनी शरद पवार यांच्याशी निष्ठा कायम ठेवत पक्षात सक्रिय राहण्याचा निर्णय घेतला. त्यांच्या या निर्णयाने त्यांच्या राजकीय बांधिलकी आणि विश्वासार्हतेची चर्चा पुन्हा एकदा रंगली आहे.
शरद पवार यांनी पाटील यांना पिंपरी-चिंचवडसारख्या महत्त्वाच्या क्षेत्रात जबाबदारी देऊन अजित पवार यांच्या गटाला थेट आव्हान दिले आहे. पिंपरी-चिंचवड महापालिकेत पुन्हा सत्ता मिळवण्यासाठी शरद पवार गटाची रणनीती आक्रमक असणार असून, पाटील यांच्या अनुभवाचा आणि स्थानिक पकडीचा उपयोग करून पक्ष आपले गमावलेले वर्चस्व परत मिळवण्याचा प्रयत्न करत आहे.
दुसरीकडे, अजित पवार यांचा गटही या निवडणुकीत कोणतीही कसर सोडणार नाही, याची चिन्हे दिसत आहेत. त्यामुळे पिंपरी-चिंचवडच्या निवडणूक रणसंग्रामात शरद पवार आणि अजित पवार यांच्यातील राजकीय लढत तीव्र होण्याची शक्यता आहे.
