Ahmedabad Hoarding Tragedy : गुजरातच्या अहमदाबाद शहरात रविवारी एक भीषण अपघात घडला. दक्षिण बोपल परिसरातील विश्वकुंज-2 अपार्टमेंटमध्ये जाहिरात होर्डिंग लावताना 10 कामगारांचा तोल जाऊन ते सातव्या मजल्यावरून खाली पडले. या दुर्घटनेत दोन कामगारांचा जागीच मृत्यू झाला असून एक जण गंभीर जखमी झाला आहे. उर्वरित सात कामगारांना किरकोळ दुखापत झाली आहे.
कसा घडला अपघात?
मिळालेल्या माहितीनुसार, पार्श्व जाहिरात एजन्सीने व्हीएस ज्वेलर्ससाठी होर्डिंग लावण्याचे काम कंत्राट घेतले होते. कंत्राटदार उमेश आणि विकास यांच्या देखरेखीखाली सुमारे 15 कामगार काम करत होते. काम सुरू असताना 10 कामगारांसह संपूर्ण होर्डिंगचा तोल गेला आणि ते थेट खाली कोसळले. होर्डिंग एका विजेच्या खांबावर आदळले आणि त्यामुळे खाली उभ्या असलेल्या एका कारचे नुकसान झाले.
दरम्यान, अहमदाबाद ग्रामीण पोलिस उपअधीक्षक नीलम गोस्वामी यांनी सांगितले की, मृतांची ओळख राज आणि महेश अशी पटली असून दोघेही उत्तर प्रदेशमधील रहिवासी आहेत. एक गंभीर जखमी कामगार सिव्हिल हॉस्पिटलमध्ये उपचार घेत आहे.
परवानगीशिवाय काम
प्राथमिक चौकशीत धक्कादायक बाब समोर आली आहे. होर्डिंग सोसायटीच्या भाडे कराराचा भाग होता, परंतु अहमदाबाद महानगरपालिका (एएमसी) कडून परवानगी न घेता हे काम सुरू करण्यात आले होते. या घटनेमुळे बांधकाम आणि होर्डिंग कामांदरम्यान सुरक्षेच्या नियमांकडे दुर्लक्ष होत असल्याचे स्पष्ट झाले आहे.
गुन्हा दाखल
या प्रकरणी पोलिसांनी अपघाती मृत्यूचा गुन्हा नोंदवून तपास सुरू केला आहे. दुर्घटनेनंतर सोसायटी व जाहिरात एजन्सीच्या जबाबदारीवरही प्रश्न उपस्थित होत आहेत.
