पुणे: मुंबई-बंगळुरू मार्गावर नवले पुलाजवळ दुचाकी घसरून दुचाकीस्वार ज्येष्ठाचा मृत्यू झाल्याची घटना घडली. बाह्यवळण येथे हा अपघात झाला. तर, दुचाकी घसरल्याने एक पादचारी धडकेत जखमी झाला. जखमी पादचारी रस्ता ओलांडत होता. मेघनारायण शिंदे (62, रा कात्रज) असे मृत्युमुखी पडलेल्या दुचाकीस्वाराचे नाव आहे.
अपघातात पादचारी गणेश कोडीतकर (50, रा. आंबेगाव पठार, धनकवडी) हे जखमी झाले. कोडितकर यांनी याबाबत आंबेगाव पोलिस ठाण्यात फिर्याद दिली आहे. मिळालेल्या माहितीनुसार, गणेश कोडीतकर हे गुरुवारी (दि. 16) सकाळी साडेपाचच्या सुमारास बाह्यवळण मार्गावरून निघाले होते. कोडितकर हे पॅनोरमा सोसायटीसमोरून रस्ता ओलांडत होते. त्यावेळी समोरून भरधाव आलेले दुचाकीस्वार शिंदे यांचे नियंत्रण सुटले आणि दुचाकी घसरली.
कोडितकर यांना दुचाकीने धडक दिली. दुचाकी घसरल्याने मेघनारायण यांच्या डोक्याला गंभीर दुखापत झाली. या घटनेची माहिती मिळताच पोलिसांनी कोडितकर आणि मेघनारायण यांना तातडीने रुग्णालयात दाखल केले. उपचारादरम्यान दुचाकीस्वार मेघनारायण यांचा मृत्यू झाला. पुढील तपास पोलिस कर्मचारी कांबळे करत आहेत.
