Amazon Layoffs 2025: सीईओ अँडी जॅसी यांच्या नेतृत्वाखाली अमेझॉनने (Amazon Layoffs 2025) इतिहासातील सर्वात मोठ्या कर्मचारी कपातीची प्रक्रिया सुरू केली आहे. कृत्रिम बुद्धिमत्ता (AI) आणि ऑटोमेशनच्या आधारे चालणाऱ्या या पुनर्रचना मोहिमेत, कंपनीने या आठवड्यात 30,000 कॉर्पोरेट कर्मचाऱ्यांना कामावरून कमी करण्याचा निर्णय घेतला आहे.
कोणत्या विभागांवर परिणाम?
अमेझॉनच्या विविध विभागांमध्ये क्लाउड सेवा (AWS), डिव्हाइसेस, कम्युनिकेशन आणि रिटेल विभागात काम करणाऱ्या कर्मचाऱ्यांवर या कपातीचा परिणाम होणार आहे. मंगळवारपासूनच अनेक कर्मचाऱ्यांना टर्मिनेशन ईमेल्स मिळण्यास सुरुवात झाली आहे. ही टाळेबंदी अमेझॉनच्या व्हाईट-कॉलर वर्कफोर्सच्या जवळपास 10% कर्मचाऱ्यांवर परिणाम करेल.
एआय आणि ऑटोमेशनमुळे बदल
सीईओ अँडी जॅसी यांनी काही महिन्यांपूर्वीच स्पष्ट केलं होतं की, ‘कंपनीची चपळता वाढवण्यासाठी आणि खर्च कमी करण्यासाठी संघटनात्मक थर काढून टाकणे आणि एआय एकत्रीकरण आवश्यक आहे.’ एआय आणि मशीन लर्निंगमुळे अनेक नियमित कामे आता ऑटोमेटेड पद्धतीने पूर्ण होत असल्याने, कॉर्पोरेट कर्मचाऱ्यांची आवश्यकता कमी होत आहे.
खर्च नियंत्रण आणि पुनर्रचना
दरम्यान, २०२२ पासून अमेझॉनने टप्प्याटप्प्याने २७,००० कर्मचाऱ्यांना कामावरून कमी केलं होतं. पण यावेळीचा आकडा विक्रमी आहे. कंपनीने महामारीदरम्यान सुरू केलेल्या खर्च नियंत्रणाच्या धोरणाला आता अधिक गती दिली आहे. २०२५ मध्ये तंत्रज्ञान क्षेत्रातील कर्मचारी कपात ही एक मोठी लाट ठरत आहे. Layoffs.fyi च्या माहितीनुसार, यावर्षीपर्यंत २०० पेक्षा अधिक टेक कंपन्यांनी मिळून ९८,००० कर्मचारी कमी केले आहेत. मायक्रोसॉफ्ट, मेटा, गुगल आणि इंटेलसारख्या दिग्गज कंपन्याही पुनर्रचना आणि एआय-ऑटोमेशनच्या दिशेने पाऊल टाकत आहेत.
एआयमुळे कामगारसंख्या कमी होणार
जॅसी यांनी अलीकडील अंतर्गत पत्रात नमूद केले की, आगामी काही वर्षांत अमेझॉनच्या कॉर्पोरेट वर्कफोर्समध्ये एआय-चालित ऑटोमेशनमुळे घट होईल, कारण अनेक ऑपरेशनल जबाबदाऱ्या मशीन लर्निंग सिस्टीम्सकडे जात आहेत. अमेझॉनची ही मोठी कर्मचारी कपात केवळ एका कंपनीचा निर्णय नाही, तर कृत्रिम बुद्धिमत्तेच्या युगात नोकऱ्यांची दिशा आणि स्वरूप बदलत असल्याचे संकेत देणारी ऐतिहासिक घटना आहे.
