मुंबई : शेअर बाजारात सातत्याने चढउतार पाहिला मिळत आहे. आठवड्याचा शेवट दमदारपणे केला. शेवटच्या ट्रेडिंग दिवशी सेन्सेक्स आणि निफ्टी सकारात्मक पातळीवर बंद झाले. सेन्सेक्स ९१८ अंकांनी, म्हणजेच १.२० टक्क्यांनी वाढून ७७५५० वर बंद झाला, तर निफ्टी २७५ अंकांनी, म्हणजेच १.१६ टक्क्यांनी वाढून २४०५० च्या वर बंद झाला. निफ्टी बँक १०९१ अंकांनी वधारला.
बीएसईच्या टॉप ३० शेअर्सपैकी २५ शेअर्स वाढीसह बंद झाले, तर उर्वरित पाचमध्ये घसरण झाली. सन फार्माचे शेअर्स जवळपास ४ टक्क्यांनी घसरले, तर आयसीआयसीआय बँकेचे शेअर्स ३ टक्क्यांहून अधिक वाढले. या वाढीमुळे, बीएसईचे मार्केट कॅप ४४४.७९ लाख कोटींवरून ४५१.२० लाख कोटींवर पोहोचले. याचा अर्थ गुंतवणूकदारांनी आठवड्याच्या शेवटच्या ट्रेडिंग दिवशी ६.४० लाख कोटी कमावले. बीएसईवर व्यवहार झालेल्या ४४४९ शेअर्सपैकी, ३३६२ शेअर्समध्ये वाढ झाली होती. ९४४ शेअर्समध्ये घसरण झाली होती आणि १४३ शेअर्समध्ये कोणताही बदल झाला नव्हता.
११० शेअर्स त्यांच्या ५२-आठवड्यांच्या उच्चांकाच्या वर व्यवहार करत होते, तर २० शेअर्स त्यांच्या ५२-आठवड्यांच्या नीचांकावर होते. ८५ शेअर्स लोअर सर्किटमध्ये आणि ३३४ शेअर्स अप्पर सर्किटमध्ये होते.
शेअर बाजारात तेजी का आहे?
वित्तीय कंपन्यांच्या शेअर्समध्ये जोरदार खरेदी होत असून, त्यामुळे बाजाराला आधार मिळत आहे. वित्त क्षेत्र आज १.६% ने वाढले असून या आठवड्यात त्यात ८.२% ची वाढ झाली आहे. निफ्टी पीएसयू बँक आणि खाजगी क्षेत्रातील बँक निर्देशांक १.८०% ने वाढले.
