Pune Water Crisis: पुणे शहरावर ओढवलेल्या पाणीटंचाईच्या संकटामुळे सध्या एक दिवसाआड पाणीपुरवठा केला जात आहे. या गंभीर परिस्थितीत पाण्याचा गैरवापर थांबवण्यासाठी पुणे महानगरपालिका (पीएमसी) आता ॲक्शन मोडमध्ये आली आहे. पिण्याचे पाणी गाड्या धुण्याच्या केंद्रांवर (वॉशिंग सेंटर), स्विमिंग पूल किंवा इतर अनावश्यक कारणांसाठी वापरण्यावर प्रशासनाने पूर्णपणे बंदी घातली आहे. पालिकेच्या पाणीपुरवठा विभागाने स्पष्ट केले आहे की, जे नागरिक किंवा संस्था या नियमांचे उल्लंघन करताना आढळतील, त्यांच्यावर थेट आणि कडक कायदेशीर कारवाई केली जाईल.
चार दिवसांत धडक मोहीम; पालिकेची विशेष पथके तैनात
पाण्याचा प्रत्येक थेंब मौल्यवान असल्याने नागरिकांनी अत्यंत काटकसरीने वापर करावा, असे आवाहन पालिकेच्या अतिरिक्त आयुक्त पवनीत कौर यांनी केले आहे. पाण्याच्या उधळपट्टीला लगाम घालण्यासाठी महापालिकेकडून विशेष तपासणी पथकांची नियुक्ती केली जात आहे. आगामी चार दिवसांत ही पथके पुण्यातील विविध भागात फिरून पाण्याचा अपव्यय करणाऱ्यांचा शोध घेतील आणि जागेवरच दंडात्मक कारवाई करतील.
एक दिवसाआड पाणीपुरवठा सुरू; तक्रारींसाठी हेल्पलाईन सज्ज
शहरात सोमवारपासून लागू झालेल्या एक दिवसाआड पाणीपुरवठ्याच्या पहिल्या दिवशी कोणतीही मोठी तक्रार आली नसल्याचा दावा प्रशासनाने केला आहे. नागरिकांच्या समस्यांचे वेळीच निवारण व्हावे यासाठी विशेष हेल्पलाईन सुरू करण्यात आली असून, संबंधित अधिकाऱ्यांवर याची जबाबदारी सोपवण्यात आली आहे. दरम्यान, पाणीपुरवठ्याचे व्यवस्थापन अधिक सक्षम करण्यासाठी सामान्य प्रशासन विभागाने पाणीपुरवठा विभागातील १२ कनिष्ठ व उपअभियंत्यांच्या बदल्या केल्या आहेत. ऐन पाणीबाणीच्या काळात तांत्रिक बिघाड होऊ नये म्हणून या बदली झालेल्या अधिकाऱ्यांवर अतिरिक्त जबाबदारी सोपवण्यात आली आहे.
…तर वर्षभर संकट कायम; मान्सूनच्या आगमनाकडे डोळे
हवामान खात्याच्या अंदाजानुसार, २० जूननंतर शहरात पावसाची शक्यता आहे. वरुणराजा वेळेवर आणि पुरेसा बरसल्यास पुणेकरांवरील हे संकट टळू शकते. मात्र, जर पावसाने दडी मारली किंवा प्रमाण कमी राहिले, तर पुणेकरांना पुढील वर्षभर दिवसाआड पाणीपुरवठ्याचा सामना करावा लागेल, अशी भीती पाणीपुरवठा विभागाच्या अधिकाऱ्यांनी व्यक्त केली आहे.
