नवी दिल्ली : काँग्रेस नेते आणि लोकसभेतील विरोधी पक्षनेते राहुल गांधी यांनी बुधवारी पत्रकार परिषद घेऊन भाजप आणि निवडणूक आयोगावर मतचोरीचे गंभीर आरोप केले. “हा हायड्रोजन बॉम्ब नाही तर मतदार यादीतील फसवणुकीचा षडयंत्र आहे,” असा थेट हल्ला त्यांनी केला. कर्नाटकमधील उदाहरणे देत राहुल यांनी दलीत, आदिवासी आणि ओबीसी मतदारांची नावे वगळली जात असल्याचा दावा केला.
त्यांनी “१०१ टक्के पुरावे” असल्याचे सांगितले आणि मुख्य निवडणूक आयुक्त ज्ञानेश कुमार यांच्यावरही टीका केली. हे आरोप २०२४ लोकसभा निवडणुकीतील कर्नाटकच्या बेंगलुरू सेंट्रल मतदारसंघातील महादेवपुरा विधानसभा क्षेत्रातील फसवणुकीवर आधारित असून, यापूर्वी ऑगस्ट २०२५ मध्येही राहुल यांनी समान आरोप केले होते. ईसीने मात्र या दाव्यांना “भ्रामक” ठरवून पुरावे मागितले आहेत, ज्यामुळे राजकीय वाद तीव्र झाला आहे.
माझ्याकडे १०१ टक्के पुरावे आहेत
राहुल गांधी यांनी एआयसीसी मुख्यालयात पत्रकार परिषद घेतली. त्यांनी मतदार यादीतील अनियमिततांचे दस्तऐवज आणि पुरावे सादर केले. “मी मोठ्या जबाबदारीने बोलत आहे. माझ्याकडे १०१ टक्के पुरावे आहेत. मतदार यादीतून काँग्रेस समर्थकांची नावे वगळली जात आहेत. दलीत, आदिवासी आणि ओबीसी मतदारांना लक्ष्य केले जात आहे,” असा दावा त्यांनी केला. कर्नाटकच्या आनंद मतदारसंघात (महादेवपुरा) ६,०१८ मते वगळली गेल्याचे उदाहरण देत त्यांनी सांगितले की, हे केवळ एका क्षेत्रापुरते मर्यादित नाही तर महाराष्ट्र, हरियाणा, उत्तर प्रदेशसह अनेक राज्यांत घडले आहे.
कर्नाटकमध्ये बाहेरून मत चोरी करण्याचा प्रयत्न
राहुल यांनी पुढे सांगितले, “कर्नाटकमध्ये बाहेरून मत चोरी करण्याचा प्रयत्न झाला. १४ मिनिटांत १२ मते काढण्याचा प्रयत्न, एका व्यक्तीच्या नंबरवर दोन फॉर्म भरण्यात आले. ३६ सेकंदात फॉर्म भरून जमा केला गेला. ज्या ठिकाणी काँग्रेसने जागा जिंकल्या, तिथली मते हटवली गेली. आयोगाने सीआयडीला कोणतीही माहिती दिलेली नाही.” हे आरोप २०२४ लोकसभा निवडणुकीत बेंगलुरू सेंट्रलमध्ये भाजपला विजय मिळवून देण्यासाठी १ लाखांहून अधिक खोटी मते तयार केल्याच्या दाव्यांवर आधारित आहेत. त्यांनी एका व्यक्तीच्या नावाने चार वेगवेगळ्या मतदारसंघांत मतदार नोंदणी असल्याचे उदाहरण दिले, ज्यात कर्नाटक, उत्तर प्रदेश आणि महाराष्ट्राचा समावेश आहे.
‘देशात मत हायजॅक’
राहुल गांधी यांनी मुख्य निवडणूक आयुक्त ज्ञानेश कुमार यांच्यावर थेट हल्ला चढवला. “आयुक्तांच्या विरोधात माझ्याकडे १०० टक्के पुरावे आहेत. मी देशावर आणि संविधानावर प्रेम करतो, पण सध्या मतांना हायजॅक केले जात आहे. टार्गेट करून काँग्रेसच्या मतांना कमी करण्याचा प्रयत्न होतोय,” असा आरोप त्यांनी केला. त्यांनी ईसीला “भाजपशी संगनमत” असल्याचे सांगितले आणि “एक माणूस, एक मत” तत्त्वाचे उल्लंघन होत असल्याचा दावा केला. राहुल यांनी पुढे म्हटले की, हे प्रकरण केवळ एका मतदारसंघापुरते नाही तर संपूर्ण देशव्यापी आहे. “मतचोरीचा मुद्दा लवकरच फुटेल,” असा इशाराही त्यांनी दिला.
