पुणे : राज्यात स्थानिक स्वराज्य संस्थांच्या निवडणुका जाहीर होताच राष्ट्रवादी काँग्रेससाठी (शरद पवार गट) धक्क्यांची मालिका सुरूच आहे. पुण्यातील उत्तर भागात प्रभाव असलेले देशमुख कुटुंब आणि त्यांचे समर्थक शिंदे गटाच्या शिवसेनेत प्रवेश करणार आहेत. हा प्रवेश गुरुवारी चाकण येथे होणाऱ्या भव्य मेळाव्यात उपमुख्यमंत्री एकनाथ शिंदे यांच्या उपस्थितीत होणार आहे.
विधानसभा निवडणुकांनंतर सतत नेते आणि कार्यकर्ते पक्ष सोडत असल्याने शरद पवार यांच्या राष्ट्रवादी काँग्रेसपुढे मोठं आव्हान उभं राहिलं आहे. आता अतुल देशमुख यांच्या प्रवेशामुळे उत्तर पुणे जिल्ह्यात पवार गटाची ताकद कमी होणार आहे.
मिळालेल्या माहितीनुसार, अतुल देशमुख, नगरसेवक, पंचायत समिती सदस्य आणि हजारो कार्यकर्ते शरद पवारांची साथ सोडून शिंदे गटाच्या शिवसेनेचा धनुष्यबाण हातात घेणार आहेत. उत्तर पुण्यात देशमुख कुटुंबाचा मोठा प्रभाव असल्याने हा प्रवेश शिंदे गटासाठी मोठं राजकीय बळ मानलं जात आहे.
नगरपालिका आणि जिल्हा परिषद निवडणुकीच्या पार्श्वभूमीवर हा बदल राजकीय समीकरणांवर मोठा परिणाम करू शकतो. अमोल कोल्हे यांचेही समर्थक असलेल्या देशमुखांनी शरद पवारांपासून दूर जात शिंदे गटात प्रवेश केल्याने राष्ट्रवादी काँग्रेसच्या गोटात अस्वस्थता निर्माण झाली आहे.
