नांदेड : महाराष्ट्रातील शिक्षणक्षेत्राला धक्का देणारी धक्कादायक घटना नांदेड शहरात उघडकीस आली आहे. एका इंग्रजी माध्यम शाळेतील शिक्षकाने त्याच शाळेतील ७ वर्षीय अल्पवयीन विद्यार्थिनीवरच बलात्कार केल्याचा संतापजनक प्रकार समोर आला. ही घटना १९ नोव्हेंबर रोजी घडली आहे. यानंतर तात्काळ पोलिसांकडे तक्रार दाखल करण्यात आली असून, आरोपी शिक्षकाला बेड्या ठोकण्यात आल्या आहेत. या प्रकरणाने संपूर्ण शहरात संतापाची लाट उसळली असून, कठोर कारवाईची मागणी होत आहे.
मिळालेल्या माहितीनुसार, पीडित मुलगी दररोज शाळेत जायची. मात्र, २० नोव्हेंबरला तिने शाळेत जाण्यास नकार दिल्याने आईला संशय आला. सतत विचारल्यानंतर मुलीने रडत-रडत सांगितले की, शाळेतील इंग्रजी शिक्षक विशाल लोखंडे याने तिच्यावर अत्याचार केला. हा प्रकार ऐकून आई अवाक झाली आणि तिने तात्काळ भाग्यनगर पोलीस ठाण्यात धाव घेतली. तक्रारीवरून आरोपीवर भारतीय न्याय संहिता (BNS) कलम ६४(२), ६५(२), ३५१(२) आणि पोस्को कायद्यांतर्गत गुन्हा दाखल करण्यात आला.
उपविभागीय पोलिस अधिकारी रामेश्वर वैजन यांनी सांगितले की, आरोपीला तात्काळ अटक करण्यात आली आहे. हा खटला फास्टट्रॅक कोर्टात चालवण्याची विनंती न्यायालयाकडे करण्यात येईल, जेणेकरून पीडितेला लवकर न्याय मिळेल. तपास सुरू असून, शाळेतील इतर विद्यार्थ्यांशी बोलणार आहोत, असेही त्यांनी स्पष्ट केले. या घटनेने “विद्येचं मंदिर” असलेल्या शाळेत मुली सुरक्षित नाहीत ही वास्तविकता समोर आल्याने पालकांमध्ये भीती पसरली आहे.
नुकताच नाशिकच्या मालेगावमध्ये ३ वर्षीय चिमुकलीवर अत्याचार करून हत्या झाल्याची घटना घडली होती. आता नांदेडमधील हा प्रकार पाहता, बालकांवरील गुन्ह्यांना आळा घालण्यासाठी कठोर कायदे आणि सतर्कता आवश्यक आहे.
